Vier polisiebeamptes in howe vir korrupsie, verkragting

Foto bloot ter illustrasie. (Argieffoto: SAPD)

Vier polisiebeamptes het Woensdag in howe in onderskeidelik Mpumalanga en Noordwes verskyn op aanklagte van korrupsie en verkragting.

Twee beamptes, sers. Ngwazi Agrippa Ngwanyama (48) en Isaack Victor Sambo (39), het in die Kabokweni-landdroshof buite Witrivier verskyn nadat hulle in hegtenis geneem is omdat hulle glo omkoopgeld van ’n motoris geëis het.

Volgens ao. Bonnie Nxumalo, woordvoerder van die Valke, het die twee beamptes glo op 26 September 2021 omkoopgeld van R10 000 geëis van ’n motoris wat hulle vir vermeende dronkbestuur voorgekeer het. Die motoris het sy vriendin gebel wat daarin kon slaag om R2 000 bymekaar te kry en sy het dit in sy rekening inbetaal.

“Die polisiebeamptes het die motoris glo in ’n polisievoertuig na ’n winkelsentrum geneem om die kontant te onttrek. Hy is ook beveel om vir die lugtyd te betaal wat gebruik is om sy vriendin te bel. Die voorval is vir ondersoek by die Valke aangemeld, wat tot die inhegtenisneming van die beskuldigdes gelei het.”

Die beamptes, wat by die Pienaar-polisiestasie gestasioneer is, is op borgtog van R2 000 elk vrygelaat en die saak is tot 4 Julie uitgestel en na die Nelspruit-handelsmisdaadhof oorgeplaas.

(Argieffoto)

Nog twee polisiebeamptes het in die Molopo-landdroshof in Mmabatho verskyn op aanklagte dat hulle ’n 20-jarige vrou verkrag het.

Otshepeng Nkate (26) en Lebogang Tladi (36) is op borgtog van R3 000 elk vrygelaat en die saak teen hulle is tot 13 Mei uitgestel.

Henry Mamothame, woordvoerder van die Nasionale Vervolgingsgesag, het gesê die beamptes se borgtogvoorwaardes behels onder meer dat hulle nie met staatsgetuies mag inmeng nie en nie enige direkte of indirekte kontak met die slagoffer mag maak nie.

Die slagoffer was op 30 Maart by haar kêrel se huis in Lorwaneng Village toe hulle glo in ’n rusie betrokke geraak het en die polisie ontbied is.

“Nadat die polisie hulle ondervra het, is sy vir opsetlike saakbeskadiging aangehou, aangesien sy vensters by haar kêrel se plek gebreek het. Sy is geboei en op pad na die polisiestasie het die polisiebeamptes glo ’n ompad geneem en vir haar gesê dat hulle haar huis toe neem.”

Die vrou is glo later gedwing om ’n soet drankie te drink wat haar lighoofdig laat voel het. “Sy beweer die beamptes het haar verkrag terwyl sy geboei was. Hulle het haar glo na die voorval huis toe geneem waarna haar gesin haar na ’n hospitaal geneem het vir mediese behandeling.”