Vier mense is dood en vyf ernstig beseer nadat drie voertuie Sondag in Kaapstad gebots het.
Keri Davids, woordvoerder van die Wes-Kaapse gesondheidsdepartement, sê die botsing het op die N2-deurpad naby Macassar plaasgevind.
“Van die voertuie was teen bome langs die pad geslinger en van die insittendes en liggame moes uit die voertuie gesny word,” het Davids gesê.
Vier volwassenes is op die toneel dood verklaar, drie mense is kritiek beseer en twee ernstig. Hulle is na nabygeleë hospitale geneem vir verdere behandeling.
Die polisie ondersoek die oorsaak van die ongeluk.