Minstens vier persone is Maandagoggend vroeg oorlede in ʼn trompop botsing naby Mookgophong (Naboomspruit) in Limpopo.
Derrick Maidment, woordvoerder van Naboom-insleepdienste, het aan Maroela Media gesê hulle is omstreeks 04:45 na die toneel op die R101, sowat 2 km buite Mookgophong, ontbied.
“Alle rolspelers en brandweer was baie vinnig op die toneel,” het Maidment bygevoeg. “Maar met ons aankoms was drie persone in die motor en die bestuurder van die bakkie reeds oorlede.”
ʼn Man, vrou en hul dogtertjie, waarskynlik tussen een en twee jaar oud, het in ʼn Hyundai Atos gery toe ʼn bakkie hulle reg van voor getref het. Al drie lede van die gesin is in die ongeluk oorlede. Die bestuurder van die bakkie het ook in die ongeluk omgekom. ʼn Passasier, wat in die bakkie gery het, is in ʼn kritieke toestand na ʼn hospitaal geneem.
“Dit is nooit lekker om op só toneel af te kom nie – veral nie as daar ʼn klein kindjie oorlede is nie,” het Maidment gesê.
Die name van die slagoffers is nog nie bekend gemaak nie. Die bestuurder van die bakkie het by ʼn veiligheidsmaatskappy gewerk.
Die omstandighede rondom die ongeluk word ondersoek. Maidment het gesê die toneel was eers teen ongeveer 11:00 opgeruim.
Sterkte aan die bedroefde families..