Vier persone is Saterdag in ʼn motorongeluk dood op die R543-pad naby Piet Retief in Mpumalanga, tussen Mkhondo en Mahamba.
Moeti Mmusi, woordvoerder van die departement van gemeenskapsveiligheid, het gesê ʼn ligte afleweringsvoertuig het omstreeks 18:00 omgeslaan. “Die slagoffers was almal passasiers. Hulle is op die toneel dood verklaar.”
Agt persone, insluitend die bestuurder, het ernstige beserings opgedoen en twee persone het geringe beserings opgedoen. “Diegene wat beserings opgedoen het, is na ʼn nabygeleë hospitaal geneem.”
Die ondersoek duur voort na die oorsaak van die ongeluk, maar volgens die voorlopige ondersoek het die bestuurder beheer verloor oor die voertuig.