Vier persone is in hegtenis geneem in verband met vermoedelik gesteelde antiretrovirale medikasie (ARV’s).
Brig. Motantsi Makhele, woordvoerder van die polisie, het gesê drie mans en ʼn vrou is Donderdagaand omstreeks 19:25 in Thabong in die Vrystaat in hegtenis geneem toe polisiebeamptes ʼn voertuig voorgekeer en op twee bokse ARV-medikasie afgekom het.
Polisiebeamptes het reageer op ʼn wenk dat ʼn voertuig die ARV’s van Kroonstad na Thabong vervoer. “Beamptes het vinnig reageer en die voertuig, ʼn wit Toyota Run X by Dr Timothy Ndakiweg voorgekeer.”
Die polisie het die voertuig deursoek en op 160 botteltjies tablette in die twee bokse afgekom. “Drie mans, tussen 31 en 43 jaar oud, en ʼn 34-jarige vrou is in hegtenis geneem. Daar is beslag gelê op die voertuig en die ARV’s.”
Die persone sal binnekort in die hof verskyn.
“Dit is die derde inhegtenisneming in ʼn kort periode waar persone met groot hoeveelhede ARV’s betrap word. Ons waardeer die gemeenskap se bystand om dié selfsugtige persone, wat regeringsinisiatiewe tot hul eie voordeel misbruik, aan te keer.”