VL reageer op uitsprake van grondonteiening sonder vergoeding

Cyril Ramaphosa

Die nuwe president van die ANC, Cyril Ramaphosa. (Foto: GCIS)

Vrystaat Landbou (VL) het met teleurstelling kennis geneem van die uitsprake van adj.pres.  Cyril Ramaphosa, nuutverkose leier van die ANC, rakende die onteiening van grond sonder vergoeding.

Francois Wilken, president van VL, het gesê die organisasie het gehoop dat Ramaphosa meer rasioneel en deurdag sal wees met sy uitsprake.

“Soos sy voorganger, pres. Jacob Zuma, maak hy egter uitsprake en beloftes sonder om die gevolge, uitvoerbaarheid en skade wat dit die land kan berokken in ag te neem,” het Wilken in ʼn verklaring gesê.

“Ongeag uitsprake die afgelope tyd deur die konstitusionele hof waar leiers en selfs die parlement aangespreek is omdat hulle nie die Grondwet eerbiedig nie, maak Ramaphosa uitsprake in stryd met wat die Grondwet, wat hy help skryf het, bepaal.”

Volgens Wilken het die ANC self die mosie vir onteiening sonder vergoeding wat verlede jaar deur die EFF voorgestel is, in 2017 in die parlement verwerp. “Landbou was nog altyd ten gunste van grondhervorming wat ordelik en ekonomies volhoubaar, binne die riglyne van die Grondwet, geskied.”

VL versoek Ramaphosa om meer duidelikheid te gee oor hoe grondonteiening sonder vergoeding kan plaasvind sonder om voedselsekuriteit, ekonomiese groei en stygende werkloosheid negatief te raak.

“VL bly verbind tot die Grondwet as die basis van enige vorm van grondhervorming en onderhandeling,” het hy afgesluit.

Maroela Media het vroeër berig Ramaphosa het Sondag aan Zoeloe-koning Goodwill Zwelithini gesê die ANC-beleid van grondonteiening sonder vergoeding moenie gedoen word op ʼn manier wat die Suid-Afrikaanse ekonomie gaan benadeel nie.

Ramaphosa het besoek aan Zwelithini afgelê by sy Osuthu-paleis in Nongoma in KwaZulu-Natal om terugvoer te gee oor die party se 54ste nasionale verkiesingskonferensie.

Hy het aan Zwelithini gesê dat daar Desember ʼn “verreikende besluit geneem is” dat die land “aan ons mense teruggegee sal word” deur middel van onteiening en sonder vergoeding, maar dat dié stappe nié die ekonomie moet beïnvloed nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Vryheid

Cyril kom van dieselfde kamp dieselfde agtergrond en dieselfde kultuur hoekom sal hy anders wees as die res van sy broers.

Hantie Janse van Vuuren

Was dit nogal te wagte.

Johan. H.

Vertrou hulle gladnie,, Lankal nie meer naief nie,,

Rupert Ashford

Hulle (die ANC) is ‘n politieke party/bevrydingsbeweging wat besig is om steun te verloor. Hulle mikpunt is om aan die mag vas te hou ten alle koste. Hulle is nou waar ‘n klomp voorgangers in Afrika ook was. So…nou word die witmense aangeval en hulle besittings word gevat om bietjie tyd te koop. Afrika draai homself nie om as hy eers op die selfvernietigingspaadjie is nie. Hoedvasdruk burgers…en byt vas julle valstande dit gaan nou vinnig en stamperig gaan op hierdie afdraande…

Frikkie Geld en huis

Ek wonder of hy darem die boere kans gaan gee om hul persoonlike eiendom , soos vee en implemente, te verwyder voordat hy die plase aan hul “regmatige eienaars” gaan oorhandig. As die titelaktes nie saam met die eiendom aan die “regmatige eienaars” oorhandig word nie, beteken dit dat die staat die “regmatige eienaar” is , wat aandui dat Cyril ons demokratiese bestel in ‘n kommunistiese bestel wil omskep.
Dit sal waarskynlik geskied in opdrag van die voorvadergeeste.