Vlak 3 nie streng genoeg nie, sê medici

(Argieffoto: Facebook)

Die skuif na vlak 3 sal nie eintlik ʼn impak hê op die stygende getal Covid-19-gevalle in die land nie en meer moet gedoen word om die land se sukkelende gesondheidsorgstelsel te help om die toeloop te kan beheer.

Só sê die Suid-Afrikaanse Mediese Vereniging (Sama) wat meen dat strenger maatreëls vereis word, veral in ʼn tyd waar die infeksiekoers hoër is as ooit tevore, en dat hospitale en medici nie die druk kan hanteer nie.

Pres. Cyril Ramaphosa het Dinsdagaand afgekondig dat Suid-Afrika weer terugskuif na vlak 3 van die afsonderingsregulasies weens ʼn skerp styging in die getal daaglikse gevalle.

“Die beperkings laat steeds te veel ruimte vir sosiale interaksie wat ons weet plaasvind sonder behoorlike voorsorgmaatreëls,” sê dr Angelique Coetzee, voorsitter van Sama. “Terselfdertyd is ons privaat en staatshospitale op kapasiteit en hulpbronne word tot ʼn maksimum gestrek. Sonder behoorlike, doeltreffende en beslissende maatreëls om die verspreiding van Covid-19 te beperk gaan ons infeksiekoers en sterftesyfer net verder styg.”

Coetzee sê skole is boonop ook steeds oop, reis word toegelaat en openbare vervoer kan normaalweg voortgaan. “Dit moes nie toegelaat geword het nie,” het sy gesê.

“Niks beduidend het verander nie. Die strenger aandklokreël en beperkings op alkoholverkope sal slegs beteken dat mense hul gedrag verander om aan te pas by dié beperkings. Dit sal nie eintlik ʼn impak hê op hul daaglikse roetine nie. Dit is waar die beperkings se teiken eintlik moes lê.”

Coetzee sê gesondheidsorgwerkers landswyd moet geloof word vir hul onverbiddelike toewyding om na hul pasiënte om te sien.

“Gesondheidsorgwerkers druk hulself tot die limiet om na hul pasiënte om te sien, maar ons regering moet vir hulle ook ondersteuning gee deur nie toe te laat dat hierdie derde golf buite beheer raak nie. Ons verstaan die implikasie van strenger maatreëls, maar dit moet ingestel word in belang van die land se veiligheid.”

Sy sê die publiek moet ook verantwoordelik optree om die styging in daaglikse gevalle te minimaliseer.

Deel van: SA-nuus

Koronanuusbrief

Wil jy op hoogte bly van alle nuus oor Covid-19 op Maroela Media? Teken in op die nuusbrief.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

90 Kommentare

jongste oudste gewildste
Johan

Genoeg van hierdie inperkings gehad. Stop dit!

Persheks Adri

Nou sê vir die taxi’s hulle moet by die huis bly en nie mense vervoer nie dis die grootste sondebokke met toe vensters en geen reëls word na gekom nie boonop veroorsaak hulle meer ongelukke en vat beddens waar Covid pasiënte eerder gehelp kon word!

marius

Vertel vir ons waarom mense wat die entsof ontvang het ingeperk word ?

JM

Ek sien gereeld hoe mense doodeenvoudig die Covid-protokol ignoreer, deur sonder maskers rond te beweeg en nie die vereiste afstand toe te pas nie. Solank hierdie traak-my-nie-agtige houding gehandhaaf word, sal die Covid-getalle aanhou styg. Strenger inperking gaan nie help nie, strenger wetstoepassing wel. Laasgenoemde ontbreek jammerlik.

Samuel

Waarom volg die regering nie die goeie raad van medici nie? Het hulle ons belange op die hart?