Vlak 4, alkoholverbod aangekondig

Pres. Cyril Ramaphosa (Foto: PresidencyZA/Twitter)

Pres. Cyril Ramaphosa het Sondagaand aangekondig dat Suid-Afrika vanaf Maandag na ’n aangepaste vlak 4 van afsondering skuif weens ’n skerp toename in Covid-19-gevalle en die teenwoordigheid van die hoogs aansteeklike Delta-variant.

Dié vlak sal vir die volgende 14 dae geld en behels heelwat strenger afsonderingsregulasies, waaronder nóg ’n verbod op die verkoop van alkohol en ’n verbod op alle byeenkomste. Die land se skole moet ook vroeër vir die wintervakansie sluit terwyl reise na en van Gauteng beperk word.

Die volgende maatreëls geld tot Sondag 11 Julie:

  • Die verkoop van alkohol word verbied om die druk op die land se gesondheidstelsel te verlig.
  • Alle byeenkomste – binnenshuis óf buitenshuis – word verbied. Dit sluit in godsdienstige, sosiale, politieke en kulturele byeenkomste.
  • Begrafnisse word beperk tot 50 roubeklaers. Nagwake en byeenkomste voor en ná begrafnisse word steeds nie toegelaat nie.
  • Strande en parke bly oop hoewel geen byeenkomste hiér toegelaat sal word nie.
  • Die landwye aandklokreël geld nou van 21:00 saans tot 04:00 soggens. Alle nie-noodsaaklike instellings, waaronder restaurante, kroeë en gimnasiums, moet teen 20:00 sluit om te verseker dat personeel en klante voor die aandklokreël tuis is.
  • Restaurante mag slegs etes vir wegneem of aflewering bedien.
  • Alle reise vir ontspanningsdoeleindes na en van Gauteng word verbied. Dit sluit nie sakereis, kommersiële reis of die vervoer van goedere in nie. Diegene wat tans nie tuis is nie en huiswaarts moet keer, sal toegelaat word om dit te doen.
  • Geen besoeke aan aftree- of versorgingsoorde word toegelaat nie.
  • Alle skole moet vanaf Woensdag begin sluit en alle skole moet teen Vrydag gesluit wees.
  • Alle kontakklasse by tersiëre instellings sal Woensdag eindig met beperkte toegang tot instansies. Koshuise sal egter oopbly.
  • Die dra van maskers in die openbaar is steeds verpligtend. Diegene wat nie ’n masker dra wat die mond en neus bedek nie, begaan volgens Ramaphosa ’n strafregtelike oortreding.

“Die maatreëls is ontwerp om soveel moontlik ekonomiese aktiwiteit sover moontlik voort te sit, terwyl die verspreiding van die virus beperk word,” het die president verduidelik.

Die sogenaamde Delta-variant, wat aanvanklik in Indië opgemerk is, is nou in vyf van die land se nege provinsies, waaronder die Oos-Kaap, die Vrystaat, Gauteng, KwaZulu-Natal en die Wes-Kaap.

Maroela Media het vroeër berig Gauteng dryf tans die Covid-19-pandemie in Suid-Afrika met ’n skerp toename in Covid-19-gevalle in elke streek van dié provinsie.

Ramaphosa het gesê 830 bykomende hospitaalbeddens is in Gauteng beskikbaar gestel deur alle elektiewe chirurgie uit te stel terwyl nog 400 beddens bekom word.

Die Solidarity Fund het intussen R16 miljoen beskikbaar gestel om die werwing en plasing van bykomende verpleegsters in Gautengse hospitale beskikbaar te stel.

Deel van: SA-nuus

Koronanuusbrief

Wil jy op hoogte bly van alle nuus oor Covid-19 op Maroela Media? Teken in op die nuusbrief.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

63 Kommentare

jongste oudste gewildste
Jan

Ten spyte daarvan dat inperkings nog nerens ter wêreld meer voor- as nadele meegebring het nie en dat die land se regulasies meer as ‘n jaar gelede deur die hof ongrondwetlik en ongeldig verklaar is, gaan die regering voort met hul vernietigende, magsbehepte optrede.

Belinda

And so, more lives and livelihoods are ruined…

annie

Waarom word operasies uitgestel? Sjirurge se werk hoop op en pasiènte ly erg. Dit maak nie sin nie. Die probleme tydens die vorige vlak 4-verbod kom net weer terug; dieselfde gedrag met duisende mense wat saamdrom, drank wat deur dieselfde voortjies dribbel teen 5x die normale prys met groot betoog vir groter toelaes. Wat laat ons glo die gamma-variant is nie reeds oppad nie. Die prez weet dalk want hy praat soos ‘n ou dominee op ‘n staat se begrafnis.

Cecilia

En nog steeds is SA agter met d inentings?
So agv n useless regering moet d landsburgers nou gestraf word.

Pio

Al kan die regering NIKS anders reg doen nie, hulle slaag daarin om die land se ekonomie op te neuk!!