Die vlieënier van ’n mikrovliegtuig het Maandagoggend kritieke beserings opgedoen nadat dié vliegtuig in Centurion neergestort het. Sy passasier (18) het matige beserings in die voorval opgedoen.
Ross Campbell, woordvoerder van ER24, sê paramedici is vanoggend na Sunderlandrif ontbied waar hulle omstreeks 07:00 met hul aankoms op die toneel die wrak van ’n mikrovliegtuig in ’n veld aangetref het.
Die 52-jarige vlieënier is op die toneel behandel voordat hy met ’n lugambulans na ’n private hospitaal gevlieg is vir verdere mediese behandeling. Sy passasier is ’n ent van die wrakstukke aangetref en het matige beserings aan sy regterbeen in die voorval opgedoen.
Hy is ook op die toneel behandel voordat hy na ’n hospitaal geneem is.
Die oorsaak van die ongeluk is nie in dié stadium duidelik nie.
Maroela Media het ’n navraag aan die Burgerlugvaartowerheid (BLO) gestuur en wag op terugvoer.
Dis hkm ek maar veilig my 2 voete stewig op moeder aarde hou.
Dit kan op die (aarde) pad) ook gebeur, jy kan in ‘n motorongeluk erger seer kry.
Als van die beste
Beide beseerdes aan my bekend. Baie sterkte aan almal wat hierdeur geraak is. Jullle is in my gebede!