VN betreur SA se ‘giftige inperkingskultuur’

Lede van die polisie en weermag op patrollie tydens die staat van algehele afsondering. (Foto: SA Weermag/Twitter)

Die Verenigde Nasies (VN) se kommissie vir menseregte het sy kommer uitgespreek oor Suid-Afrika se “giftige inperkingskultuur”.

Georgette Gagnon, die kommissie se bedryfshoof, het Maandag tydens ʼn mediakonferensie die “hoogs gemilitariseerde” operasies deur die veiligheidsmagte betreur.

“Ons het berigte ontvang oor die oneweredige gebruik van mag deur veiligheidsbeamptes, veral in arm en informele nedersettings,” het Gagnon gesê.

“Rubberkoeëls, traangas, waterkanonne en swepe is gebruik om sosiale distansiëring in rye buite winkelsentrums asook buite huise af te dwing.”

Volgens Gagnon is daar reeds teen vroeg April meer as 17 000 mense in Suid-Afrika in hegtenis geneem vir beweerde oortreding van die afsonderingsregulasies.

Sy het gesê dit is kommerwekkend dat die onafhanklike polisieondersoekdirektoraat (Opod) verskeie klagte van onder meer “moord, verkragting, aanranding, die afvuur van vuurwapens en korrupsie” teen polisiebeamptes ondersoek wat dus op ʼn “giftige inperkingskultuur” dui.

Michelle Bachelet. Foto: (AP Photo/Marco Ugarte, File)

Michelle Bachelet, die VN se hoë kommissaris vir menseregte, het gesê voorvalle van misbruik is ook in ander Afrikalande opgeteken.

“Om iemand te skiet, in aanhouding te neem of te misbruik vir die verontagsaming van regulasies omdat hulle desperaat na kos soek, is duidelik ʼn onaanvaarbare en onwettige reaksie. Dit is ook die geval wanneer dit vir ʼn vrou moeilik of gevaarlik gemaak word om by ʼn hospitaal te kom om geboorte te gee. In sommige gevalle sterf mense weens die onvanpaste toepassing van maatreëls wat vermoedelik ingestel is om hulle te red.”

Bachelet het benadruk dat respek vir mense se regte “waaronder ekonomiese, maatskaplike en kulturele, burgerlike en politieke regte”, en die beskerming daarvan, “noodsaaklik is vir die sukses van die openbare gesondheidsreaksie en herstel van die pandemie”.

Die VN se kommer oor Suid-Afrika se toepassing van die landwye afsondering is uitgespreek net enkele dae voor ʼn aandklokreël van 20:00 tot 05:00 van Vrydag af ingestel gaan word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Werner

Hulle is net gepla omdat dit nou weer in die informele nedersettings is hulle het nog nie n woord geuiter oor plaasmoorde nie gemors

Willem

FEITE Werner

Strandloper

Tiepiese “Animal farm” senario…

Maya

Ek is so bly dat hierdie vergrype en magsmisbruik van sommige polisie- en weermaglede opgemerk is deur ‘n internasionale organisasie. Dit behoort nie so te wees nie.

Leon

Sy is maar baie stil oor wat in Suid Amerika aangaan en die ander lande waar betogers hardhandig behandel word. Sy sal daarvan hou as helfte van Suid Afrika dood lê van die Covid virus. Of wil sy haar land se medise personeel en weermag instuur om oor te vat en te doen wat ons doen. Wil ons sejker kom kolonialiseer.