Voëlklip: Nóg ʼn ma, kleuter vermis na motor by krans afstort

Talle polisielede en reddingswerkers is ontplooi om na die ma en haar dogtertjie te soek. (Foto: Malcolm Pojie/SA Polisie)

Polisieduikers, lede van die Nasionale Seereddingsinstituut en reddingswerkers was Donderdagmiddag terug by die berugte Voëlklip-uitkykpunt in Heroldsbaai in die Wes-Kaap waar ʼn voertuig weer oor die krans gestort het.

Volgens die polisie was ʼn 34-jarige ma van George en haar tweejarige dogtertjie in die voertuig toe dit van die krans afgery het. Hulle word steeds vermis.

ʼn Agtjarige seuntjie wat ook in die voertuig was, het sonder beserings ontsnap en is na ʼn hospitaal geneem.

Die uitkykpunt het reeds talle lewens geëis.

In een van die bekendste voorvalle is Heidi Scheepers (35) en haar twee jong kinders in Oktober 2019 by Voëlklip dood nadat hul voertuig daar in die see beland het. Scheepers en haar tweejarige seuntjie, Hugo, het verdrink toe hul voertuig oor die krans gestort het. Hugo se liggaam is eerste gevind en Heidi se liggaam ʼn paar dae later.

Die sesjarige Cozette se liggaam is nooit gevind nie.

Die departement van vervoer en openbare werke in die Wes-Kaap het in Januarie verlede jaar aangekondig hy beraam planne om moontlik veiligheidsmaatreëls by die berugte krans aan te bring.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

11 Kommentare

jongste oudste gewildste
Ben

Hoe moeilik kan dit tog wees om n reeling te bou? Jan tot Jan en daar is nog niks gedoen nie!

Annatjie

Moontlik planne! Mense gaan dood en hulle gaan moontlik iets doen. Siek!

LIEZL

Ek verstaan glad nie, as daar nie ‘n pad is nie, dan kan jy mos nie net daar af ry nie. Of is die pad naby die afgrond? Kan iemand verduidelik seblief? Iemand wat weet hoe dit lyk daar?

Alta

Gaan na YouTube en tik in Voelklip krans dan kan jy videos sien van die plek

Pitbul

Die naam sal moet verander na spookklip.. dinge gaan net verkeerd daar…