Voertuig ry bo-oor wag in parkeerarea

‘n Skermskoot uit die video toon hoe die veiligheidswag voor die bakkie staan. (Video: Intelligence Bureau SA)

ʼn Video van ʼn veiligheidswag wat in ʼn parkeerarea van ʼn winkelsentrum in Stellenbosch oënskynlik met opset deur ʼn motoris raakgery word, het Dinsdag opslae op sosiale media gemaak.

Die video wat deur Intelligence Bureau SA op Facebook geplaas is, wys hoe ʼn wit Corsa-bakkie die parkeerarea binnekom en in ʼn parkeerplek intrek. Die beeldmateriaal spring dan na waar die voertuig ʼn ruk later uit dié parkeerarea trek. Die veiligheidswag probeer die verkeer reguleer en staan effens voor die motor. Die motor ry dan oomblikke later oor die sekuriteitswag wat vermoedelik nie uit die pad wou beweeg nie.

Sosialemediagebruikers het met skok en afgryse op die video gereageer.

Lt.kol. André Traut, Wes-Kaapse polisiewoordvoerder, het die gebeure in die beeldmateriaal aan Maroela Media bevestig.

Volgens Traut het die voorval op 30 April tussen 14:30 en 15:00 plaasgevind.

“Die sekuriteitswag was aan diens in die parkeerarea en het die verkeer gereguleer. Hy het die motor aangesê om om te draai aangesien die motor in die verkeerde rigting gedraai het om uit die parkeerarea te ry. Die bestuurder van die motor het die sekuriteitswag [met die motor] teen die grond gestamp en oor hom gery,” verduidelik Traut.

Die wag is na ʼn nabygeleë hospitaal geneem vir mediese behandeling. Sy toestand en die aard van sy beserings is in dié stadium onbekend.

Volgens Traut ondersoek die polisie ʼn saak van poging tot moord.

*Weens die ontstellende aard van die video het Maroela Media besluit om nie die video te publiseer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Ai

Ai party mense hou daarvan om vir hulle self moeilikheid te maak. Wat het hy nou daarvan. Amper iemand se dood veroorsaak. Arme Veiligheidswag, het ook maar net sy werk gedoen.

Dienkie

Die feit dat hierdie motoris net wegry nadat hy die wag raakgery het is uiters ontstellend. Hoop hierdie motoris word opgespoor.

Dries du Toit

Die mense in die land raak mal. Die verkiesing dra ook nie by nie. Ek bespeur opgewondenheid, agressiewiteit, depressie en moedeloosheid wat hande uitruk in die laaste tyd. Ons kan maar net op kns kniee gaan en bid

Pieter

Baie waar

Foxi

Hoop hulle het die drywer opgespoor. Seker iemand wat net ‘FEDUP’ is van als!