‘Volledige opname van plek in skole nou nodig’

skool klaskamer skoolhoof

Argieffoto

Die Gautengse onderwysdepartement móét ’n volledige oudit van elke skool in die provinsie doen ten einde te bepaal waar die grootste druk is en waar skole onderbenut of leeg staan.

Só meen die Skoleondersteuningsentrum (SOS) nadat Panyaza Lesufi, Gautengse LUR vir onderwys, Donderdag “aansoek”-sones vir skole in Gauteng aangekondig het.

Leerders wat binne ’n 30 km-radius van ’n bepaalde skool woon, sal nou toegelaat word om by hierdie skool in te skryf. “Dit sal verseker dat leerders wat ver van ’n goeie skool woon, nie benadeel word nie,” het Lesufi gesê.

Die GDO onderskei skynbaar nou tussen 5 km-voedersones en 30 km-aansoeksones. Bestaande voedersones van 5 km-radius is steeds van toepassing en hoe nader ’n leerder aan die skool woon, hoe beter is die kanse dat hy of sy hier aanvaar sal word. Hierdie regulasies sal geld wanneer ouers volgende jaar aanlyn aansoek doen om plek vir hul kinders in Gautengse skole.

“Om die gebied waarbinne leerders aansoek kan doen te vergroot, is nie die oplossing vir ’n gebrek aan beplanning en plek in skole nie,” sê Melanie Buys, onderwyskenner verbonde aan die SOS.

“Die departement moet eerder ’n behoorlike oudit doen van hoeveel skole in elke distrik is en presies hoeveel plek elk van hierdie skole beskikbaar het.” Sy wys daarop dat Olievenhoutbosch Primary in Centurion die afgelope paar jaar leeg staan, al kan die meeste skole in Centurion nie voorbly met aansoeke nie.

“Ouers wil eenvoudig nie hul kinders na Olievenhoutbosch Primary stuur nie omdat die gehalte van onderrig wat leerders hier ontvang, nie op peil is nie. In sulke gevalle moet die departement eerder die gehalte van onderpresterende skole verbeter as om meer leerders per bus aan te ry na enkele uitnemende skole.”

Buys beklemtoon ook dat die departement steeds verplig is om bestaande protokol te handhaaf wanneer leerders by skole geplaas word. Hiervolgens moet die departement eers leerders plaas wat die naaste aan ’n skool woon, dan leerders wat reeds broers of susters in die skool het, en dan leerders wie se ouers binne ’n 5 km-radius van die skool af werk.

“Dan eers kan leerders wat verder as 5 km van die skool woon, geplaas word. Die skool se taalbeleid speel ook steeds ’n rol en die departement moet die taal van onderrig aan ’n bepaalde skool in ag neem voor ’n leerder geplaas word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
m.d.r.

Waarom skole verskil in standaard van onderrig, terwyl ALMAL dieselfde sillabus moet volg, sal Meneer Lesufi dalk kan verklaar.
Die logiese optrede is sekerlik om alle skole op ‘n minimum standaard van opleiding te kry…..en sodoende die toelatings druk te verminder…
Wat ook duidelik blyk, is dat onder Lesufi se beheer, baie aansoeke uit rassisme geplaas word, en dat die taal van onderrig gebruik word as verskoning vir sy blatante rassisme.

Die logiese uitweg is dat Lesufi baie vinnig vervang moet word,– sonder promosie en sonder die gewone goue handdruk…

Martin

Sy hele plan is om die taalbeleid by Afr skole te verander.

1+1

Om opvoedkundige beginsels te gebruik ter verdediging van oorvol skole, Taalkwessies ens. gaan ons niks help nie. Die realiteit is in die voorafgaande nuusberig vervat. “Dit gaan oor die gehalte van onderrig”. Verander daardie sake wat jy kan soo,s beter onderwysopleiding en keuring van studente,

Om statestiek in te samel oor skole wat leegloop is te reaktief. Werk aan langtermyn en volhoubare oplossings.

Johann

Hierdie Lepoefi se dom astrante moedswillige ras behepte arrogansie gaan onderwys kelder. n anargis wat als sal verwoes om sy sin te kry

Dell

Hierdie voedingsarea is ‘n groot klug. Ek praat uit ondervinding. My kind gaan volgende jaar graad 8 toe. Ons het n skool 2km van ons af en een 14km van ons af. Albei Afrikaanse skole. Kinders om ons kry nie plek in die naaste skool nie en moet 14km verder skoolgaan. Kinders wat weer daar bly het met die eerste inname plek by ons gekry. Jy kan 6 uur die middag by die skool verby ry, dan sit daar nogsteeds kinders by die hekke, wat moet wag vir vervoer huis toe. Die kinders lei daaronder.