Vonke spat in parlement se Eskom-debat

Natasha Mazzone. Foto: Facebook

Die vonke het vanmiddag behoorlik gespat in die Nasionale Vergadering toe ’n debat oor Eskom plaasgevind het.

Die debat is aangevra en ingelei deur die DA-LP Natasha Mazzone. Sy meen die Suid-Afrikaanse publiek word deur Eskom gyselaar gehou met beurtkrag as die mes teen die keel.

Mazzone het met vers en kapittel bewys dat pres. Cyril Ramaphosa reeds sedert 2014 die man in politieke beheer van Eskom is, en dus nie die verantwoordelikheid op enigiemand anders kan afskuif nie.

Mazzone meen privatisering is die antwoord en het uitgewys sy het reeds ’n wysigingswetsontwerp in daardie verband ingedien.

Een van die redes wat sy aanvoer is dat die R69 miljard wat oor die volgende drie jaar vir Eskom bewillig is, nie die oplopende Eskom-skuld van R419 miljard kan delg nie.

Mazzone voer dus aan Eskom in sy huidige vorm gaan sink, en dat al die ANC se praatjies tot die teendeel beteken hulle dink die kiesers is dom.

Namens die EFF het Nazier Paulsen gesê Eskom word tans ondergrawe as ’n komplot om privatisering te verseker. Hy meen Ramaphosa en Jeff Radebe, minister van energie, is deelkragtig daaraan om hul familie, by name die miljardêr Patrice Motsepe, te bevoordeel, en dat ’n staatsmynboumaatskappy die antwoord is om uitbuiting met steenkoolpryse te keer.

Narend Singh. Foto: IVP

Die IVP‑LP Narend Singh het gesê onder ANC-beheer het Eskom binne agtien jaar van die beste kragvoorsiener ter wêreld in een van die swakstes verander.

Vir die VF Plus het Wouter Wessels die skuld vir die Eskom-krisis voor die ANC se deur gelê, byvoorbeeld omdat hulle geen stappe doen om die skuld aan Eskom in te vorder nie en omdat hulle toegelaat het dat Eskom twaalf hoofamptenare in tien jaar kry.

Hy het regstellende aksie die skuld gegee en gesê verskeie Eskom-ingenieurs bou tans aan ’n kragstasie in die Filippyne omdat hulle weens hul ras nie by Eskom welkom is nie.

Hy het sowel die ANC as die DA die skuld vir regstellende aksie gegee en gevra dat die beste persoon vir die pos in die pos aangestel word.

Wouter Wessels. Foto: Facebook

Die DA-LP Kevin Mileham het gesê Eskom word drooggebloei deur ANC-munisipaliteite soos Maluti-A-Phofung in Phuthaditjhaba, Emalahleni (eens Witbank), Dihlabeng (Bethlehem) en Thaba Tsweu (Sabie), wat gewoon nie hul rekeninge betaal nie.

Mileham het aangevoer die grootste sondaar is Soweto, en gevra dat hulle onder die bestuur van Johannesburg geplaas word sodat kostes verhaal kan word.

Agang se LP, Andries Plouamma, het gesê as die ANC ernstig was oor die bekamping van korrupsie, was die voormalige ANC-LP Brian Molefe al in die tronk, en die DA-LP Solly Malatsi het gesê die VF Plus moet maar kyk – die DA slaan die ANC eerste terwyl die VF Plus nog wonder hoe om terug te slaan – en dit met iemand soos die voormalige Wes-Kaapse premier, Peter Marais.

Die minister van openbare ondernemings, Pravin Gordhan, het ’n lang toespraak oor verantwoordelike debatvoering gehou, ontken dat Eskom geprivatiseer sal word en die versekering gegee die presidensiële taakspan is aan die werk om te verseker Eskom funksioneer beter.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
John

Gordhan speel te veel engeltjie. Hy is ook een van die oupas was al aftree-ouderdom bereik het saam met talle ander ou kaders wat net nie wil laat los nie. Maar daar is ook nie ander bevoegde mense nie: 12 van die een en ‘n dosyn van die ander.

Ella

Ek dink dis n groot fout om enige geld vir Eskom te gee. Dit gaan verdwyn soos al die ander geld wat hulle ontvang het.
Die regering moet self uitvind vir wie geld geskuld word en di aan hulle betaal. Maar met die korrupsie tans is dit dalk ook fataal.
As ek nie verkeerd is het Soweto n paar weke gelede aangebied om R100 per huishouding per maand te betaal. Is dit nie beter as niks nie?
Ek het nie goeie moed dat die probleem opgelos gaan word.

Stella

Hulle kan debatte hou tot vervelens toe,kom nerens nie!erkenning….??..die land is goed en behoorlik op gedinges deur,Ek sal liewer nie verduidellik nie,wat nie meet die job kan doen nie maarwil ook nie UITTREE nie!!

Afrikaner

Die ANC het als wat gewerk het die afgelope 24 jaar afgebreek en het hierdie land met sy obsessie teen wit mense met BEE in die grond getransformeer. Eskom sal nooit reg kom nie.
Maar hulle besef nie hulle self is die probleem nie, lees hier:
https://www.news24.com/SouthAfrica/News/breaking-gordhan-demands-apology-from-anc-after-party-says-he-attacked-black-engineers-20190221

Magda Smit

Witbank betaal nie hulle rekening aan Eskom nie maar ons, die inwoners, word maandeliks gedwing om duisende rande aan rekeninge te betaal. Rekeninge wat hulle nie kan bewys WAAR hulle daaraan kom nie. Betaal ons nie word dit summier afgesny.