Voormalige finansiële hoof van VBS gevonnis

Phillip Truter tydens ‘n vorige hofverskyning. (Foto: Itumeleng English/ANA)

Die voormalige finansiële hoof van VBS Bank, Phillip Truter, is tien jaar tronkstraf opgelê nadat hy skuldig gepleit het op aanklagte van bedrog, korrupsie, geldwassery en rampokkery.

Die Palm Ridge-handelshof het drie jaar van die vonnis vir vyf jaar opgeskort, het Sipho Ngwema, woordvoerder van die Nasionale Vervolgingsgesag (NVG), gesê.

Truter het onderneem om sy samewerking aan die staat te gee. “Hy was aandadig en in diens tydens die VBS-debakel en het besluit om oop kaarte te speel,” het Ngwema gesê.

Truter is saam met die voormalige VBS-voorsitter Tshifhiwa Matodzi, VBS- uitvoerende hoof Andile Ramavhunga, VBS-tesourier Phophi Mukhodobwane, voormalige direksielede van die VBS en verteenwoordigers van die Openbare Beleggingskorporasie (OBK) Ernest Nesane en Paul Magula, voormalige ouditeursvennoot van KPMG Sipho Malaba, asook voormalige finansiële hoof van die polisie Phalaphala Ramikosi, by die skandaal betrek.

Die mans word daarvan beskuldig dat hulle in 2017 bedrieglike finansiële state opgestel, onderteken en goedgekeur het. Só het hulle valslik aan beleggers en die publiek voorgehou dat die bank in ʼn bestendige finansiële posisie was, terwyl dit eintlik insolvent was.

Sowat R2,3 miljard is na bewering binne twee jaar uit die bank se fondse getap.

“Wetstoepassingsagentskappe moedig altyd óf fluitjieblasers óf beskuldigdes wat na vore wil kom aan om ʼn volledige, openhartige en eerlike openbaarmaking van hul betrokkenheid by hulle slegte winste te doen,” het Ngwema gesê.

“Met tye, veral wat korrupsie betref, het wetstoepassers die samewerking van diegene in die binnekring nodig. Baie van dié skemas is betreklik geslote en net ʼn nou groepie sal kennis dra van die bedrywighede wat aan die gang was. Iemand soos Truter, wat besluit om aanspreeklikheid vir sy optrede te aanvaar, sal altyd aangemoedig word om met die staat te praat en sulke eerlikheid word verwelkom.”

Volgens Ngwema vorder die Valke en NVG se saak teen diegene betrokke by die VBS-skandaal goed.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Dries

Wel ek hoop ALLE medepligtiges wat op watter manier ook al voordeel getrek het uit hierdie bankroof, word vasgetrek en gestraf.

Scalla

Word die fondse terug verhaal, die wiel draai, wag vir nog baie kaders

Genis

Hoop die EFF word ook vinnig vervolg… die deler is so goed soos die steler

Johanncb

Kom ons hoop daar is binnekort nóg meer vonnisse wat opgelê word! Laat die wet sy gang gaan! Ons wag hiervoor!

Magda

Nog baie wat verhoor en gevonnis moet word, wag in spanning maar nie verbaas dat n Wit persoon eerste gevonnis word nie, wonder maar net oor die ander skuldiges – Ons almal weet wie ne?