‘Voorsitter van Spur-paneel moet onttrek’

Argieffoto

Die vakbond Solidariteit en die burgerregte-organisasie AfriForum het vandeesweek ʼn uitnodiging om ʼn voorlegging te maak aan die paneel wat die Spur-voorval ondersoek van die hand gewys.

Sowel dr. Dirk Hermann, bedryfshoof van Solidariteit, as Kallie Kriel, uitvoerende hoof van AfriForum, het die paneel daarvan beskuldig dat hulle subjektief is en aangevoer dat die paneel konsessiehouers, personeel en kliënte verder sal benadeel omdat hulle bevooroordeeld is.

Die paneel wat op 26 en 27 Junie in Woodmead, Johannesburg, sal vergader, word gelei deur prof. Elmien du Plessis, ʼn regsgeleerde aan die Potchefstroomkampus van die Noordwes-Universiteit, en bestaan uit prof. Kopano Ratele van die Instituut vir Sosiale en Gesondheidswetenskappe by Unisa, verteenwoordigers van Sonke Gender Justice, dr. Wynoma Michaels, ʼn sakekonsultant wat maatskaplike kwessies aanpak en Cobus Bester, ʼn radiopersoonlikheid.

Hulle sal onder meer die beeldmateriaal bestudeer van die voorval, waar ʼn man gedreig het om ʼn vrou aan te rand nadat hy beweer het haar kind het sy kind geklap. ʼn Video van die heftige woordewisseling tussen die twee ouers, wat in Maart vanjaar by die Texamo Spur in die suide van Johannesburg plaasgevind het, het soos ʼn veldbrand versprei en ʼn rasseherrie op sosiale media ontketen. Spur het ná die voorval besluit om die vrou om verskoning te vra en die man is alle Spur-restaurante in die land belet.

Die paneel het aangedui dat hulle ook voorleggings oor die voorval sal aanhoor en het Solidariteit en AfriForum uitgenooi om ʼn spesiale voorlegging oor die voorval te maak, op grond van die belangstelling wat die organisasies in die saak geneem het, het Du Plessis in haar uitnodiging aan AfriForum geskryf.

Kriel het in sy e-pos aan Du Plessis uiteengesit hoekom die organisasie nie aan die paneel sal deelneem nie en sover gegaan om van die paneellede as “openlike anti-Afrikaanse aktiviste” te beskryf.

Hy het gesê Du Plessis is ʼn uitgesproke ondersteuner van die “Open Stellenbosch”, “Reform PUK” en die anti-Afrikaanse “#feesmustfall”-bewegings en aangevoer dat sy haar as voorsitter aan die ondersoek moet onttrek sodat daar vinniger ʼn oplossing in belang van Spur se konsessiehouers, personeel en kliënte gevind kan word.

“AfriForum meen die paneel se ondersoek sal veral Afrikaanse kliënte verder vervreem, omdat Spur se uitvoerende hoof om onverstaanbare redes dit nodig geag het om mense, wat hulleself aktief beywer vir die stryd teen Afrikaans by universiteite, by sy strategie te betrek. Dit terwyl ʼn groot deel van Spur se Afrikaanse kliëntebasis benadeel word deur die aanslag op Afrikaans as universiteitstaal.

“Ons simpatie in die Spur-debakel lê by die Spur-konsessiehouers en hulle personeel. Hierdie mense is die slagoffers van Spur se uitvoerende bestuur se eensydige hantering van die debakel,” het Kriel gesê.

Mark Farrelly, hoofbedryfsbeampte van Spur, het in Mei gesê die hele voorval het gelei tot ʼn wegblyaksie wat sekere konsessiehouers swaar getref het. Sommige konsessiehouers het reeds tussen 24% en 45% op hulle maandelikse inkomste verloor.

“Spur se onafhanklike paneel is nie onafhanklik nie, dit is ʼn Spur-paneel wat Spur se standpunt moet bevestig,” het Hermann gesê. Hy het ook aangevoer dat die Spur in die proses om ʼn uitspraak oor die restaurantgroep se hantering van die bepaalde en soortgelyke voorvalle die gevaar staan om nie hulle getroue kliëntebasis se stem te hoor nie.

“Konsessiehouers wil rustigheid hê, maar die paneel gaan net ʼn nuwe politieke herrie rondom Spur laat uitbars. Ons beveel aan dat Spur fokusgroepe met kliënte en konsessiehouers hou om te bepaal hoe hulle voel.

“Solidariteit sal eerder saam met konsessiehouers met Spur in gesprek wil tree oor hoe die spanning gaan verhoog. Ons het met tientalle konsessiehouers gesprek gevoer oor die druk wat topbestuur se besluite op hulle plaas en die effek op hul restaurante,” het Hermann bygevoeg.

Du Plessis het gesê hy is bewus daarvan dat AfriForum en Solidariteit besluit het om nie ʼn voorlegging aan die paneel te maak nie. “Dit is hulle keuse om nie deel te neem nie. Dit is egter jammer dat hulle nie aan die forum deelneem nie, juis omdat hulle sterk menings daaroor het.”

Sy het gesê Hermann se aanbeveling dat Spur fokusgroepe met kliënte en konsessiehouers hou, is ʼn goeie voorbeeld van ʼn voorstel wat aan die paneel gemaak kan word. “Soos ek verstaan, en Spur kan dit self bevestig, was die restaurantgroep deurentyd met konsessiehouers en kliënte in verbinding sedert die voorval plaasgevind het.

“Ek wil egter benadruk dat konsessiehouers en kliënte ook uitgenooi word om aan die proses deel te neem om voorleggings te maak.”

Du Plessis het gesê die paneel verteenwoordig ʼn wye spektrum van standpunte en uitgangspunte. “Ons sal moet redes gee vir ons bevindinge en daarin lê die wigte en teenwigte. Die voorleggings wat gemaak word, dien verder die doel om diverse standpunte in ag te neem. Die paneel se persoonlike en professionele integriteit is op die spel en daarom sal ons enige bevooroordeeldheid vermy.”

Op Kriel se aantygings teenoor Du Plessis se standpunte het sy die volgende gesê: “Ek is vir ʼn inklusiewe benadering gegrond op herstellende geregtigheid, in my persoonlike sowel as professionele hoedanigheid. ʼn Inklusiewe benadering beteken juis dat ek nie anti-iets is nie, veral nie teen enige spesifieke taal nie. Dit is juis ook die rede hoekom ek dit jammer vind dat Solidariteit en AfriForum nie wil deelneem nie. Ek dink verder nie dit is sinvol om as voorsitter van die paneel te bedank net omdat ʼn enkele belangegroep my bedanking eis nie.”

Du Plessis het weereens benadruk dat daar ʼn ope uitnodiging aan die publiek is om voorleggings te maak en dat alle voorleggings ewewigtig en met dieselfde erns hanteer sal word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

179 Kommentare

jongste oudste gewildste
Joan Labuschagne

Gaan julle ook die eerste gedeelte van video waar die aanranding plaasgevind het vertoon en bespreek of slegs waar die lelike bakleiery plaasvind?

Johann

As ek juis reg verstaan soos ek nou die dag betreffende die paneel gelees het, ondersoek hulle spesifiek weer wat in die video opgeneem en daar paasgevind het, dus mis hulle nog steed die punt waaroor Dr Dirk Hermann in sy artikel hier op Maroela geskryf het: “Dit gaan NIE meer oor die voorval nie, maar HOE die Spur daarop reageer het. ”

En na al die geroei en stoei, luister die Spur en, lyk dit my nou, die paneel ook nie. Hulle kry dus net die nie kloutjie by die oor nie.

Retha

Laat hulle maar hulle swanesang sibg, ONS GAAN NIE TERUG SPUR TOE NIE. Punt.

Annie

Ek stem saam Spur sien my nie weer nie. Maak nie saak wat hulle nou probeer doen nie.

Johann Marx

En dit alles oor een ongemanierde kind ‘n ander klap omdat hy of sy nie sy sin kon kry nie? Dis pateties om die minste te sê….Spur kan nou maar paneelbesprekings hou tot in ewigheid….ons het klaar gesien wat ons wou, beleef wat gebeur het, en met ons voete en beursies ‘n standpunt ingeneem. NIKS wat Spur nou doen, sal hulle swak hantering van die situasie ongedaan maak nie. Die “paneel” het nog nie eens begin nie……..en almal stry alreeds oor wie bevooroordeeld is, en wie nie, en wie pro-Afrikaans is en wie nie. Laat Prof du Plessis by haar… Lees meer »