Vreemde gebeure teister Malema-aanrandingverhoor

Julius Malema by die Randburgse landdroshof (April 2022) (Foto: EFF/Twitter)

Die aanrandingsaak teen Julius Malema, EFF-leier, en Mbuyiseni Ndlozi, EFF-LP, is Vrydag weereens deur vreemde gebeure geteister.

Die beweerde aanranding van SAPD-kolonel Johannes Venter, wat aanleiding gegee het tot hierdie saak, het plaasgevind by Winnie Mandela se begrafnis in 2018. Nadat die staat se finale getuie weens siekte in April 2022 nie kon getuig nie, is die saak na vandag uitgestel.

Die finale getuie kon egter weer nie die hofverrigtinge bywoon nie en het ’n mediese sertifikaat ingedien. Die staat het aansoek gedoen om verdere uitstel van die saak.

Tydens ‘n uitspraak ingevolge artikel 342A van die Strafproseswet het die landdros opgemerk dat, omdat die oorspronklike klagstaat nie beskikbaar was nie en klaarblyklik verlore is, dit onmoontlik was vir die hof om vas te stel wie die proses in die verlede vertraag het.

Die landdros moes gevolglik ’n besluit neem op grond van die argumente voor hom vandag en het hy enige verdere uitstel geweier ten spyte van die vermelding van verdagte faktore met betrekking tot die mediese sertifikaat.

Nadat die staat sy saak in ooreenstemming met die hof se uitspraak gesluit het, het die hof op aansoek van die verdediging die aangeleentheid vir doeleindes van ’n aansoek om ontslag tot 3 Junie 2022 uitgestel.

AfriForum het by die saak betrokke geraak nadat die Nasionale Vervolgingsgesag (NVG) aanvanklik huiwerig gelyk het om die betrokke individue te vervolg. Daarna het die burgerregteorganisasie se privaatvervolgingseenheid homself by die ondersoek betrek en kon ’n afskrif van die dossier verskaf, aangesien die oorspronklike dossier en die oorspronklike klagstaat verlore geraak of verdwyn het. Hierna het die staat aangekondig dat hy wel gaan vervolg en AfriForum se regsverteenwoordigers het ’n waaksaamheidsopdrag in die saak aanvaar.

“AfriForum is bekommerd dat die EFF regdeur die verhoor politieke saamtrekke op die hofperseel gehou het,” sê Reiner Duvenage, veldtogbeampte vir strategie en inhoud by AfriForum. “Lede van die EFF is ook met gholfstokke opgemerk terwyl hulle vandag die saamtrek bygewoon het. Dit kan geïnterpreteer word as ’n intimidasietaktiek. Verder vind ons dit merkwaardig dat die verdediging aan die hof aangedui het dat dit weens die onredelike vertraging in die saak gereed was om voort te gaan met ’n mondelinge aansoek ingevolge artikel 174 om die beskuldigdes vry te spreek sonder om te getuig.”

Tog, nadat die staat sy saak gesluit het, het die verdediging aangedui hy is skielik nie gereed om met die mondelinge aansoek voort te gaan nie en is uitstel toegestaan ​​om betooghoofde in te dien, voeg Duvenage by.

“Deur sy eie optrede gaan die EFF voort om homself te ontbloot as ’n haatlike en gevaarlike verskynsel in die politieke landskap. Malema en Ndlozi moet aanspreeklik gehou word vir hul dade soos enige ander lid van die samelewing. AfriForum sal voortgaan om te veg teen politici wat hulself as verhewe bo die wet beskou.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

4 Kommentare

jongste oudste gewildste
Marius

Die knaap moes lankal in die tronk gewees het.

Jannie van Niekerk

Klink vir my of ons land se regstelsel enige iets moontlik sal doen om Malema NIE te vervolg nie.

miche

Malema se “golfstok-taktiek” verwys heel moontlik na Johan Rupert se golf-estate, ensovoorts. Malema en kie is mos uitgesproke daaroor en het onlangs opgeruk soontoe.

Dries

Ons lewe in n haatlike land ook a gv haatlike politieke partye. 2 VAN HULLE