ʼn Bejaarde vrou is dood en 17 mense beseer nadat ʼn minibustaxi en ʼn bakkie in Bhomela aan die KwaZulu-Natalse suidkus gebots het.
Chris Botha, woordvoerder van Netcare911, sê van die beseerdes was in die wrak vasgekeer. Hy sê die bejaarde vrou is met paramedici se aankoms op die toneel dood verklaar.
“Drie mense is kritiek beseer, nege mense is ernstig beseer terwyl vyf mense wonderbaarlik met slegs ligte beserings daarvan afgekom het.”
Die beseerdes is op die toneel behandel voor hulle na ʼn hospitaal in Port Shepstone vervoer is vir verdere behandeling. Die oorsaak van die ongeluk word ondersoek.