Vrou in aftreeoord met graaf aangeval, het net aanhou bid

Suzanne Giliomee ná die aanval. (Foto: Verskaf)

’n Bejaarde vrou van Meyerton in Gauteng het net aanhou bid totdat die twee onbekende mans in haar huis in ʼn aftreeoord die donker in gevlug het.

Suzanne Giliomee (74) is Sondag in die vroeë oggendure in haar huis in die Big Creek-aftreeoord oorval en aangerand toe sy haar hond omstreeks 03:00 buite toe geneem het om ʼn draai te gaan loop.

Giliomee het vir ʼn oomblik op haar rusbank gaan sit en die deur op ʼn skrefie oopgelos vir die hond om terug te keer toe twee mans skielik die deur oopstoot.

Daleen van der Westhuizen, Giliomee se dogter, verduidelik die mans het eintlik die buurman en sy vrou, wat weg was op vakansie, se huis geteiken toe hulle van plan verander en by Giliomee se huis instorm.

“Een van die mans het daarop aangedring dat sy haar arm vir hom moet gee, maar sy het geweier en het net begin om ‘In Jesus naam’ hardop te sê,” vertel Van der Westhuizen.

Die man het haar stilgemaak en weer vir haar arm gevra. Wéér het Giliomee geweier. Die man was besig om sy gulp los te maak toe Giliomee weer pleit: “In Jesus naam. Jy sal nié.”

Volgens Van der Westhuizen het die ander makker aanvanklik in Giliomee se kamer rondgekrap, waar hy haar handsak en grimeringsakkie gesteel het. Hy het weer by die sitkamer ingestap toe Giliomee dit sê.

Dié man het op sy beurt vir Giliomee geskop “maar sy het haar man gestaan,” sê Van Der Westhuizen.

Die verdagtes het toe ʼn graaf in die tuin in die hande gekry en vir Giliomee met die graaf oor die kop geslaan voordat hulle laat spaander het. Hulle is steeds soek, sê Giliomee se dogter.

Giliomee het toe haar kans gesien om na die ander hek, wat na die oord lei, te hardloop en alarm onder die bure oorkant die pad te maak. Van der Westhuizen het kort daarna die oproep oor die aanval op haar ma ontvang.

“Ek het juis my ma uit ʼn slegte area weggevat om in ʼn veilige sekuriteitskompleks te woon. Toe gebeur dít.”

Volgens Van der Westhuizen is dit die eerste voorval by die oord.

Giliomee het ʼn groot sny op haar kop opgedoen en moes agt steke ontvang om die wond te heg. Die graaf het haar elmboog gedurende die voorval getref en haar sy is steeds seer as gevolg van die skop wat sy toegedien is.

“Sy is nog baie seer en duiselig,” vertel Van der Westhuizen vandag. “Sy is nou skrikkerig en bang vir die donker. Sy het vanoggend vir die eerste keer ʼn traumaberader gesien.”

Die betrokke polisiewoordvoerder kon nie vir kommentaar bereik word nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
charmaine

N aftree oord ook nou nie eers mee veilig nie? Word die nou die nuwe ding om te doen? Aftree oorde waar oumense juis gaan om hulle laaste paar lewensjare rustig te wees.
Ek se altyd die meederheid mense gaan nie dood gaan aan oumense siektes of enige ander tipe dood nie ons gaan net uitgemoor word.
Weereens hoe gebeur dit waar mense juis gaan om veilig te wees? Iemand van binne?

KaterinaKat

Het sy 3 uur in die Nag die hond laat uitgaan om sy draai te loop? Ons het n huishond, n Fox Terrier. Ek maak maar agter haar skoon as sy n glipsie het in die nag. Maar ek maak geen deur oop daai tyd vd nag nie, nie vir enige rede nie.

mickey Botha

Sy is nie verkrag nie, so haar gebede het gehelp.

Jana

Die tannie is genadiglik nie verkrag nie. Dis hoe die gebed gehelp het. Dit kon baie erger gewees het. God het nooit gesê ons gaan nie swaarkry nie maar Hy het belowe dat as ons deur iets moeilik gaan is Hy reg by ons. Net omdat God nie ‘n gebed beantwoord soos jy sal wil hê Hy moet nie is nie te sê Hy antwoord nie.

Gerrit

…omdat ons toelaat dat boewe ons regeer, òf verkies dat boewe ons regeer.