Vrou in hof oor vakansieverblyf-‘slenter’

Een van verskeie sosialemediaplasings waarin mense beweer dat hulle deur Marianne Tome Roux ingedoen is. (Skermskoot: Facebook)

ʼn Vrou wat na bewering dosyne voornemende vakansiegangers mislei het met besprekings vir verblyf in gastehuise in die Suid-Kaap, is Maandagoggend borgtog in die Thembalethu-landdroshof in George geweier.

Marianne Tome Roux is verlede week in hegtenis geneem en het die naweek agter tralies by die Conville-polisiestasie in George deurgebring. Sy het vanoggend op verskeie aanklagte in die hof verskyn, onder meer diefstal, en het op al die aanklagte onskuldig gepleit.

Die saak is tot aanstaande maand uitgestel en sy bly in aanhouding.

Roux het na bewering sedert verlede jaar gereeld mense genader wat op sosiale media na vakansieverblyf in die Tuinroete gesoek het en het glo op bedrieglike wyse deposito’s en huurgeld van duisende rande in haar sak gesteek. Sedert besonderhede oor haar inhegtenisneming bekend geraak het, het dit op sosiale media gegons en het die klaers ʼn uiters aktiewe WhatsApp-groep op die been gebring.

Konst. Lindinkosi Yoko van George, die ondersoekbeampte, het die afgelope naweek onverpoos verklarings afgeneem ten spyte daarvan dat hy tans met siekteverlof is en selfs vroeër verlede week nog in die hospitaal was.

Die klaers kon vanoggend nie uitgepraat raak oor die uitstekende diens wat hulle van die beskeie konstabel ontvang het nie. Een van die klaers, Estelle Ciaglia van Kaapstad, het sonder meer begin help om al die inligting te koördineer en dit aan Yoko deur te gee.

Nog mense het sedert Vrydag landwyd sake teen Roux aanhangig gaan maak en terwyl Yoko Vrydag slegs twee dossiere gehad het, kon hy teen vanoggend die hof inlig oor minstens 12 klagte wat by ander polisiestasies ingedien is.

Ciaglia het aan Maroela Media vertel dat sy ʼn saak in Bellville aanhangig gemaak het toe sy besef dat sy deur Roux ingeloop is. Ciaglia het Roux in Februarie R4 000 as ʼn deposito vir vakansieverblyf in Desember vanjaar betaal. Soos in verskeie ander gevalle het Roux na bewering later vir Ciaglia vals bewyse dat haar geld terugbetaal is van ʼn Capitec-rekening af gestuur.

“Ons vier volwassenes en ʼn klein babatjie en twee bulterriërs sou in Sedgefield aangekom het in Desember sonder dat ons ʼn heenkome gehad het. Ek sidder as ek daaraan dink,” sê sy.

Francois Gerber van George was een van die eerste klaers wat reeds verlede jaar deur Roux genader is nadat hy sy huis as vakansieverblyf geadverteer het. Roux het glo beweer dat haar onderneming, Eden Travel & Events, vakansieverhurings doen en dat sy reeds huurders vir sy huis het.

Hy sê hy het daarop aangedring dat die vakansiegangers hom direk betaal, maar Roux het glo ʼn deposito van R2 000 vir moontlike skade gehef wat sy volgens hom later nie wou terugbetaal nie.

Nadat sy na bewering ook aan hom verskeie vals bewyse van betaling gestuur het, het hy ʼn klag teen haar aanhangig gemaak. Met die polisie by die saak betrokke het Roux glo wel die geld oorbetaal.

Die saak is toe nie verder gevoer nie totdat Gerber op sosiale media gesien het dat Ciaglia na mense soek wat soos sy ingeloop is met vakansieverblyf.

Konst. Lindinkosi Yoko, die ondersoekbeampte in die saak. (Foto: Verskaf)

Nadia Edwards van Polokwane het R7 000 in Roux se bankrekening inbetaal vir verblyf in Desember 2019, maar moes tot haar groot ontsteltenis van die eienaar van die vakansiehuis hoor dat sy nie daarvan weet nie en ook geen vooruitbetaling ontvang het nie. Edwards het aan Maroela Media gesê sy is net dankbaar dat haar gesin vroegtydig gehoor het dat hulle ingeloop is, want hulle is nege mense wat vir drie weke in Desember sou kom uitspan en voor dooiemansdeur sou aankom.

Anne Linder van Sedgefield ken Roux sedert haar kinderdae toe sy saam met Linder se dogter, Megan, op skool was. Sy sê sy wou haar nuwe vakansieverblyf verhuur en het Roux kans gegee om die verhuring te doen, maar dié het R4 800 deposito van die huurders gevra en dit na bewering nooit aan haar oorbetaal nie. Met ʼn groot gesukkel het sy later wel die helfte daarvan ontvang.

Mariana Bergman van Knysna het haar huis verlede jaar op Facebook geadverteer en is ook na bewering deur Roux genader met die belofte dat sy dit onmiddellik kan verhuur. Volgens Bergman het Elvin Waite van Port Elizabeth meer as R17 000 aan Roux betaal en vir drie weke tydens die Kerstyd in die Bergman-woning gewoon terwyl hulle elders met vakansie was.

By hul terugkeer het Bergman Roux vir haar geld gevra, maar Roux het beweer sy is ingeloop en het Bergman lank aan ʼn lyntjie gehou en glo verskeie vals bewyse van betaling aan haar gestuur. Sy het daarna glo weer foto’s van Bergman se huis aan ʼn voornemende huurder, Shane de Bruin van Pretoria, gestuur en ʼn deposito van R9 000 van hom ontvang om die huis vir Desember vanjaar te huur.

Yoko het vanmiddag op die klaers se WhatsApp-groep ʼn stemboodskap gelaat waarin hy almal vir hulle samewerking bedank. “Ek hoop dat ons hierop kan voortbou en ook in die toekoms saam kan werk,” het hy gesê. “Ek hoop dis die begin van iets groots wat ons nie alte dikwels in ons land sien nie.”