Vrou in hof vir senior regeringsbeampte se moord

Argieffoto (StevePB, Pixabay)

Argieffoto (StevePB, Pixabay)

Die vrou van ʼn senior regeringsbeampte sal Woensdag in die Oos-Londen landdroshof verskyn op aanklag van sy moord.

Bulelwa Ndudula (42) is Vrydag in Tsomo in hegtenis geneem, nadat haar man, Sakhekile Ndudula, die voormalige hoof van personeel by die Oos-Kaapse departement van maatskaplike ontwikkeling, verlede maand by sy huis doodgeskiet is.

Maroela Media het vroeër berig ʼn huurder wat in die agterplaas van Sakhekile se huis in Cambridge-Wes in Oos-Londen woon, het ʼn buurman geroep toe hy sien hoe Sakhekile met sy bebloede bolyf teen sy motor in die oprit van die huis leun. Hy is verskeie kere geskiet. Sakhekile is na ʼn hospitaal gehaas, waar hy aan sy wonde beswyk het.

Sizwe Kupelo, Oos-Kaapse regeringswoordvoerder, het vroeër bevestig die oorledene was ʼn senior beampte in die kantoor van die LUR vir maatskaplike ontwikkeling, Nancy Sihlwayi.

Nadat die polisie drie weke lank Sakhekile se raaiselagtige moord ondersoek het, het bewyse aan die lig gekom wat sy vrou die hoofverdagte in die saak gemaak het en sy is in hegtenis geneem.

Bulelwa het reeds vroeër vandeesweek in die hof verskyn en sal vandag na verwagting om borgtog aansoek doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Scalla ·

Seker nie die regte manier om probleme uit te sorteer nie, vrou was baie kwaad vir hom, wonder wat was die oorsaak.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.