Vrou jok glo maande lank oor kwalifikasie

Asisipho Mbekela (Foto: Facebook)

ʼn Jong vrou wat na bewering maande lank oor haar kwalifikasie gejok het terwyl sy as radiografis by die Livingstone-hospitaal in Port Elizabeth gewerk het, het Dinsdag vlugtig in die plaaslike handelshof verskyn.

Asisipho Mbekela (25) van Walmer Heights in Port Elizabeth staan tereg op aanklagte van bedrog nadat sy haar glo as ʼn radiografis in 2016 voorgedoen het sonder dat sy oor die nodige kwalifikasie vir dié departementele pos beskik het.

Mbekela is op ʼn kontrakbasis deur die departement van gesondheid aangestel om haar gemeenskapsdiensjaar by dié hospitaal vanaf 1 Januarie tot 31 Desember 2016 te voltooi. Mbekela het egter eers in Maart daardie jaar begin werk en is later in September afgedank.

Volgens die klagstaat het Mbekela destyds op haar Z83-aansoekvorm aangedui dat sy ʼn kwalifikasie as radiografis by die Kaapse Skiereiland Universiteit vir Tegnologie in 2015 verwerf het.

Die staat voer aan dat Mbekela egter gejok het aangesien sy dié diploma gedruip het. Mbekela het net een van haar vier vakke tydens haar finale eksamen in November 2015 geslaag.

Die saak is vandag tot 29 April uitgestel aangesien afskrifte van die dossier nog gemaak moes word en die hof nog op sentralisering van die aanklagte wag. Mbekela is borgtog toegestaan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Koos

Is registrasie by HPCSA nie nodig om te praktiseer as radiografis nie? As dit is sal hulle dit mos opgetel het?

Thea

O aarde wat van die arme pasiente waarvan sy x-strale moes neem?

Judge Dredd

Nuwe wetgewing se sy kan 5 jaar tronkstraf kry. Kom ons kyk wat gebeur.

sinies

Die korrekte woord is LIEG!

Roelf

Bevorder haar tot dept. Hoof!
Sy gaan baie goed doen in die politiek. Binne maande LUR of selfs Minister.