Vrou op plaas tydens aanval geskiet, glo verkrag

Argieffoto

ʼn 44-jarige ma van drie het met ʼn koeël in haar lae rug saam met ʼn man wat haar na bewering op ʼn plaas buite Hankey in die Oos-Kaap pas aangeval en verkrag het, na ʼn kitsbank gery sodat hy geld uit haar rekening kon onttrek.

Kapt. Gerda Swart, polisiewoordvoerder, het Maandag by navraag aan Maroela Media gesê die voorval Vrydagaand net voor middernag plaasgevind.

“ʼn Verdagte het na bewering toegang tot die huis verkry deur verskeie skote deur ʼn glasdeur te skiet. Die vrou was tydens die voorval alleen tuis saam met haar minderjarige kinders en is in die skietery gewond,” het Swart gesê. Die vrou se man was na bewering op ʼn jaguitstappie ten tyde van die voorval.

Swart het gesê die verdagte het die vrou in haar voertuig na ʼn kitsbank in Hankey geneem om daar geld te gaan onttrek. “Terwyl die verdagte besig was om die geld te ontrek, kon die slagoffer daarin slaag om met haar voertuig weg te kom. Sy het na ʼn ander plaas in die gebied gery en hulp ontbied.”

Die vrou is ná die aanval na ʼn hospitaal geneem vir mediese behandeling. Sy is intussen ontslaan, maar is erg getraumatiseerd.

Speurders van die Hankey-polisie en beamptes van die provinsiale georganiseerde misdaadondersoekeenheid het sedert die voorval onverpoosd gewerk en kon daarin slaag om Sondag omstreeks 22:30 ʼn 30-jarige verdagte in verband met die voorval in hegtenis te neem.

Volgens Swart is nog ʼn persoon vir ondervraging ingeneem, maar weer laat gaan aangesien die persoon nie met die voorval verbind kon word nie.

Die verdagte moet Dinsdag in die Hankey-landdroshof verskyn op aanklagte van huisroof, poging tot moord, verkragting, die rig van ʼn vuurwapen, aanranding met die opset om ernstig te beseer, diefstal en ontvoering. Meer aanklagte kan dalk in ʼn latere stadium by die klagstaat gevoeg word.

Die slagoffer se naam mag nie bekendgemaak word nie om haar identiteit te beskerm.

Brig. John Lebok, bevelvoerder van die Humansdorp-polisiëringsgebied, het die span beamptes geloof vir hul harde werk en toewyding wat tot die inhegtenisneming gelei het.

“Ek is tevrede met die vinnige inhegtenisneming aangesien die gemeenskap wat ons dien dit van ons verwag en dit ook ʼn sterk boodskap aan voornemende geslagsgegronde misdadigers stuur dat diegene wat vroue en kinders aanval, nie geduld sal word nie,” het Lebok gesê.

Lebok het ook lede van die gemeenskap bedank wat met inligting na vore gekom het wat die polisie in hul ondersoek bygestaan het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Skokkend

POGING TOT MOORD … jullle was vinnig om die kisouens aan te kla vir POGING tot moord en ONTVOERING terwyl die man nie eers ‘n SKRAPIE aan hom gehad het nie en hier word aanranding met die doel om ernstig te beseer ‘n saak gemaak nadat ‘n vrou GESKIET EN VERKRAG IS net omdat die aanvallers die REGTE KLEUR IS?? JULLE IS SIEK MAN!

jaco

Dié mense is siek. Hulle sal met antibiotika behandel word…

linda van rooyen

vinnige inhegtenisname se voet die vrou sal nooit weer dieselfde wees nie

Werner

Skade is klaar gedoen dit lyk ook nie of aanvallers hulle juis dood skrik vir die polissie se boodskappe nie as ek dit nie mis het nie was daar nog n aanval in die oos Kaap na hierdie een

Attie

snaaks ek lees huis roof maar niks van plaas aanval nie lyk my dis die regeering wat nou eerder die sake so oopmaak dat dit nie te erg lyk vir die buite wereld nie