Vrou steeds in hospitaal ná NW-plaasaanval

Blackie van den Berg kort na die aanval. Foto: Verskaf

Blackie van den Berg (61), die vrou wat Vrydag in die vroeë oggendure op ʼn plaas tussen Sannieshof en Ottosdal in Noordwes oorval en wreed aangerand en verkrag is, sterk steeds in ʼn hospitaal in Klerksdorp aan.

Bianca van den Berg, Blackie se dogter, het Saterdag aan Maroela Media gesê haar ma het baie erge pyn ná die aanval. “Haar neus is gebreek, haar oë toegeswel en haar lippe geswel. Hy het haar só erg gewurg, sy kan omtrent nie eet nie. Hy het haar vreeslik geslaan,” het Bianca gesê.

Sy het gesê dat haar ma ook deur een van die aanvallers verkrag is. Van den Berg het toestemming gegee dat hierdie inligting bekendgemaak mag word.

Maroela Media het vroeër berig Van den Berg was alleen by die huis toe die aanval omstreeks 00:45 gebeur het. Volgens Bianca was sy in die kombuis toe sy ʼn geluid op die dak gehoor het byna soos ʼn kat wat op die dak loop. Sy het daarna gesien dat haar hond buite die huis onder die lapa toegemaak is nadat sy hom vroeër die aand laat uitkom het.

“Sy het gehoor hoe hulle die veiligheidshek by die voordeur uit die kosyn breek en besef hulle is besig om die huis binne te kom. Sy het na die kamer toe gehardloop en die veiligheidshek in die gang agter haar gesluit. In die kamer het sy haar rewolwer gekry. Teen daardie tyd was een van die aanvallers klaar besig om die traliedeur in die gang oop te buig terwyl die ander aanvaller buite die huis gestaan het,” het Bianca gesê.

Sy vertel Van den Berg het ʼn paar waarskuwingskote in die lug geskiet, maar toe die aanvaller geen gehoor hieraan gee nie, het sy die rewolwer op hom gemik en geskiet. “Sy was so verbouereerd, sy het mis geskiet en die rewolwer leeggeskiet. Daarna het sy teruggehardloop kamer toe en die houtdeur van die kamer gesluit,” het Bianca gesê.

Van den Berg het in die kamer haar buurvrou gebel om hulp te kry toe die aanvaller begin om die houtdeur met ʼn spitvurk oop te breek. “Sy het vir hom gesê sy gaan hom skiet, toe sê hy vir haar in Afrikaans: ‘Skiet maar, ons kom vir jou.’ Al wat sy kon doen, was om angsbevange daar te sit en wag met die wete iemand is op pad om haar dood te maak,” het ʼn emosionele Bianca gesê.

Blackie van den Berg in die hospitaal. Foto: Verskaf

Nadat die aanvaller deur ʼn gat in die deur die kamer binnegekom het, het hy Van den Berg met die spitvurk aangerand en haar herhaaldelik geslaan. Hy het haar klere van haar lyf af geskeur en haar ook verkrag. Volgens Bianca het haar ma verbete terugbaklei en die aanvaller geslaan, geskop en gekrap.

In ʼn stadium het die aanvaller die rewolwer gegryp en dit op Van den Berg gerig en die sneller getrek, maar daar was nie meer patrone in die vuurwapen nie. “Toe hy besef die rewolwer is leeg, het hy haar gewurg. Hy wou haar doodmaak,” het Bianca gesê. “Net toe het die bure daar aangekom en sy makker buite die huis het gefluit om hom te waarsku. Hy het my ma aan haar hare in die gang af gesleep en toe op die vlug geslaan.”

Die aanvallers het met kontant, ʼn selfoon en Van den Berg se vuurwapen gevlug.

Bianca het gesê haar ma woon alleen op die plaas sedert haar pa agt jaar gelede oorlede is. Sy verhuur die grond en boer ook self met skape.

Lt.kol. Amanda Funani, woordvoerder van die polisie, het Vrydagaand aan Maroela Media bevestig twee aanvallers, onderskeidelik 21 en 24 jaar oud, is in verband met die voorval in hegtenis geneem. Hulle sal Maandag in die Delareyville-landdroshof verskyn.

Die DA het hom intussen skerp uitgespreek oor die vlaag plaasaanvalle in Noordwes. Carin Visser, die DA se provinsiale voorsitter, het gesê die nuus van Van der Berg se brutale aanval het die hele provinsie geruk.

“Die toename in plaasaanvalle bewys net weereens die DA se kommer dat mense wat op die platteland bly se veiligheid nie gewaarborg kan word nie,” het Visser gesê. “Ons doen ʼn beroep op die polisie om hierdie sinnelose aanvalle te ondersoek en seker te maak dat al die skuldiges aan die pen ry.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

106 Kommentare

jongste oudste gewildste
Berhalet

Mevrou van den Berg… Ek is só jammer dat jy hierdie trauma moes beleef. Mag God jou seer vertroos, mag Hy jou deur hierdie onverstaanbare ervaring dra. Ek wens ek kon my arms om jou sit en my binneste vir jou gee om jou heel te help maak. Maar vanaand en elke aand vorentoe sal jý in my gebede wees. Mag jy spoedig herstel van die fisieke seer!

willie

indien ek sê wat ek wil sê is ek ook môre toegesluit! baie sterkte en beterskap vir jou vroutjie!

JJ

Ja en steeds swyg die premier van Noordwes oor die blankes wat aan die hand van swart mens sterf en verniel word!

al

Moet nie dat hierdie varke jou siel breek nie! Ek het ñ vrou geken wat in die dorp gebly het en deur ñ morsige straatloper verkrag was.
Sy het haar lewe se stukke opgetel en nie toegelaat dat die vark haar vreugde en menswees steel nie.l! Sy het sterker en beter daar uitgekom.

MCH

Hoe kan julle n vrou alleen op die plaas los kinders? Dis Noordwes, dis Suid Afrika!