Vrou voor verloofde geskiet

Carine van Staden en Johan Harmse. Foto: Via Facebook

Carine van Staden (28), ʼn inwoner van Pretoria, is Donderdag voor haar verloofde glo deur ʼn weermaglid in die noorde van die stad geskiet.

Carine se pa, Johan van Staden (53), het Saterdag aan Maroela Media gesê sy dogter en haar verloofde, Johan Harmse (29), was omstreeks 18:00 van Daspoort op sy BMW-motorfiets op pad na vriende in Montana toe ʼn amptelike weermagvoertuig hulle naby Wonderboom Junction ligtelik getref het.

“Die voertuig, ʼn wit Audi, het weermagnommerplate gehad en ons het intussen vasgestel die jong man wat dit bestuur het, is glo ʼn drywer vir een van die generaals,” het Van Staden gesê.

“Die man het die motorfiets se voetrus getref waarop Carine se voete was en die man het toe net weggejaag,” het hy gesê.

Harmse het ʼn draagbare videokamera aan sy valhelm gehad, dit aangeskakel en die voertuig agterna gesit.

“Die verkeerslig by die hoek van Lavenderweg en Braam Pretoriusstraat was rooi en die man moes stilhou. Carine het afgeklim en hom genader om te hoor hoekom hy weggery het. Hy het bloot net sy deur oopgemaak en ’n pistool reguit in haar bors gedruk en haar ten aanskoue van haar verloofde en ander motoriste geskiet.”

Die man het daarna glo ook sy vuurwapen op Harmse, wat nog op sy motorfiets was, gerig voordat die verkeerslig groen geslaan en hy weggery het. Harmse se video van die voorval is aan die polisie as bewys oorhandig.

Carine is na die George Mukhari-hospitaal gehaas waar sy tans aansterk. “Die koeël het haar hart skrams gemis. Dit is deur haar linkerlong en agter haar rug uit. Haar long het platgeval, maar verder is geen ander organe beskadig nie. Sy is gelukkig ʼn sterk mens en is by haar positiewe. Sy is stabiel en dit gaan goed met haar onder die omstandighede.”

Harmse en Van Staden is ná haar opname na die Sinoville-polisiestasie om die voorval aan te meld. Dit was sowat ʼn uur en ʼn half ná die voorval. Die weermaglid was toe reeds daar en het, aldus Van Staden, aangevoer hy het gedink Carine wou hom kaap. Hy het nooit amptelik ʼn klag aanhangig gemaak nie.

Ao. Johan van Dyk, polisiewoordvoerder, het Saterdag aan Maroela Media bevestig aanvanklik is ʼn klag van die afvuur van ʼn vuurwapen in ʼn openbare gebied en roekelose en nalatige bestuur teen die man aanhangig gemaak voordat hy op waarskuwing vrygelaat is.

“Ons kan bevestig dat die saak intussen na ʼn poging tot moord verander is. Die polisie is besig met verdere ondersoek en is besig om almal se verklarings af te neem, waarna die dossier na die Nasionale Vervolgingsgesag verwys sal word om oor verdere stappe te besluit,” het Van Dyk gesê.

Dit is nie duidelik hoe lank dié prosedures gaan duur nie. Die weermaglid is nog nie in hegtenis geneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

78 Kommentare

jongste oudste gewildste
Eps

Was dit ‘n witman wat ‘n swartvrou geskiet dan was hy al lankal toegesluit en borgtog geweier en ‘n skare gehuur om te betoog.

Justice

“Op waarskuwing vrygelaat” – ek neem dus aan dat die skieter nie `n blanke is nie.

Cheryl

Grenade NEE!!! Dis dan poging tot moord en die weermaglid is nog nie inhegtenis geneem nie… Hoe dan nou?? Hy Kan Mos nie net skiet nie. Ek dink hy praat deur sy ore om te sê hyt gedink hy word gekaap… Daar staan die Dame dan voor hom en hy skiet net. Ag nee die land maak my siek… Maar rand nou iemand aan dan word jy toegesluit…. Siek man lyk my moord en poging tot moord is nie so ernstig soos aanranding nie..

Kobus Smit

Plaas die video op die openbare media. Dis al wanneer daar reaksie sal wees.

Hanna

Maar die KFC-manne is dadelik toegesluit? Het ek iets gemis? O ja, ek het vergeet dat blanke jong dames deesdae swartes se motors kaap…. Dis seker hoekom hy geskiet het. Bleddie dubbele standaarde.