Vroue gewaarsku oor nuutste grimering-gier

Crayola, die vervaardiger van kinderspeelgoed, het ʼn streng waarskuwing uitgereik in die lig van ʼn nuwe gier wat op sosiale media die ronde doen.

Die nuwe gier behels die gebruik van vetkryte as grimering. Talle gebruikers het video’s op YouTube gelaai waarin daar verduidelik word hoe om die kryte te smelt en as grimering aan te wend.

Crayola het in ʼn verklaring gesê veiligheid is hul topprioriteit aangesien hulle produkte vir kinders vervaardig. “Hoewel ons produkte nie giftig is nie, beveel ons nie aan dat dit gebruik word om oogomlyner, lipstiffie of ander grimering te maak nie, en ons ontmoedig die gebruik daarvan op dié manier.”

Crayola het gesê sy produkte is nie bedoel vir gebruik op ’n persoon se vel of gesig nie. “Grimering word aan spesifieke en streng toetse onderwerp omdat dit bedoel is om op ʼn persoon se vel te gebruik. Aangesien ons inkleurpotlode en vetkryt nie hiervoor bedoel is nie, is dit nie op dieselfde manier getoets nie en moet dit nie as grimering gebruik word nie.”