VSA waarsku burgers oor SA-lughawe

Foto: OR Tambo via Facebook

Die Amerikaanse ambassade het Amerikaanse burgers vandeesweek gewaarsku om ekstra waaksaam te wees wanneer hulle op die OR Tambo Internasionale Lughawe land en na hul hotelle of ander verblyf moet reis.

Die ambassade sê in die verklaring “verskeie reisigers” was al in ʼn gewapende rooftog betrokke wanneer hulle op dié lughawe land, en dat sommige van die mense ook in die voorval geskiet of gewond is.

“Amerikaanse burgers moet liefs vermy om in die aand op OR Tambo te land. Geen vorm van vervoer vanaf die lughawe is veilig of sonder enige risiko nie. Reisigers moet ekstra waaksaam wees wanneer hulle op die lughawe land én die lughawe verlaat,” lui die verklaring.

Die ambassade het ook sy burgers gewaarsku om versigtig te wees as hulle met kontant rondloop of geld by ʼn kitsbank onttrek. Hy het reisigers verder aangeraai om duur juwele te verberg of dit glad nie met hul aankoms by die lughawe te dra nie.

Fikile Mbalula, minister van polisie, het verlede week tydens ʼn perskonferensie beloof om sekuriteit by die lughawe op te skerp om sodoende die veiligheid van reisigers te verseker.

Die toerisme-besigheidsraad van Suid-Afrika (TBCSA) het Mbalula se toespraak geprys, en nuwe veiligheidsmaatreëls vir die OR Tambo-lughawe verwelkom.

Navorsing van Suid-Afrika se toerismeraad toon dat die enkele grootste rede waarom buitelandse besoekers nié na Suid-Afrika kom nie, uit vrees vir hul veiligheid is.

Verskeie misdaadvoorvalle wat by dié lughawe afgespeel het, is vanjaar aangemeld, onder meer met talle mense wat na hul huise gevolg en beroof word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Charles

Nerns in Suid Afrika is mense veilig nie, die regering kan of wil niks daaraan doen nie, geen een is bevoeg om veiligheid te handhaaf nie.

Kabous

Het nooit by die ou Jan Smuts lughawe gebeur nie.

Johan

So lek die storie van ‘n disfunksionele land en regering al wyer die wêreld in. Oor wat dit vir beleggersvertroue beteken laat mens ys

Hans

Wat n terugslag vir ons toerismebedryf

schalk

Nou is die VSA seker rassisties??