’n Vullisverwyderaar is Dinsdagoggend met ’n helikopter na ’n hospitaal vervoer nadat sy arm in die hidrouliese vullispers van ’n vullistrok in die ooste van Pretoria beland het.
Shawn Herbst, woordvoerder van Netcare 911, sê paramedici is omstreeks 08:22 na Mooikloof Glen ontbied waar hulle met hul aankoms ’n ernstig beseerde vullisverwyderaar aangetref het.
Die man se linkerarm het in die vullistrok se hidrouliese vullispers beland terwyl dit toegegaan het.
Die man is op die toneel gestabiliseer terwyl die stad se brand-en-reddingsdienste gespook het om sy arm met behulp van hidrouliese toerusting te bevry.
’n Helikopter is weens die aard van die man se beserings ontbied en hy is na ’n spesialiskliniek gevlieg vir mediese behandeling.
Sjoe, dit moet baie erg wees. Hoop hy behou sy arm.
Gesoute vulliverwyderaars deursoek sakke alvorens dit in die bin gegooi word…..