Vuurwapens steeds vermis ná inbraak by polisiestasie

Argieffoto: SAPD

Argieffoto: SAPD

ʼn Spesiale taakspan, wat onder andere kenners uit Pretoria bevat, is steeds op soek na verdagtes wat by ʼn Oos-Kaapse polisiestasie ingebreek en talle vuurwapens gesteel het.

African News Agency berig die inbraak is Dinsdag by die Peddie-polisiestasie geregistreer nadat brig. David Kanuka, die Grahamstad-distrik se polisiebevelvoerder, tydens ʼn inspeksie by die polisiestasie was.

Dit is nie duidelik wanneer die inbraak plaasgevind het en hoeveel verdagtes daarby betrokke was nie.

Volgens bronne, wat verkies om anoniem te bly, het die verdagtes glo toegang tot die versterkte stoorkamer waar wapens en bewyse gehou word, deur die plafon verkry. Altesaam 30 vuurwapens, waaronder amptelike polisiewapens en wapens wat gekonfiskeer is, is glo gebuit. Dit behels glo minstens ses haelgewere, nege pistole, 12 R5-gewere en drie Berettas.

Brig. Marinda Mills het vroeër vandeesweek bevestig die voorval is aangemeld en dat ʼn spesiale taakspan die voorval ondersoek.

“Die taakspan bestaan uit die provinsiale taakspan wat bygestaan word deur kenners uit Pretoria,” het sy gesê. Sy kon nie bevestig presies hoeveel wapens weg is en wat dit behels nie. “ʼn Volledige oudit is aan die gang om dit vas te stel.”

Mills het Vrydag aan Maroela Media gesê niemand is nog in verband met die voorval in hegtenis geneem nie en die vuurwapens word nog vermis. “Die speurders volg verskeie leidrade op en die ondersoek duur voort,” het sy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

44 Kommentare

jongste oudste gewildste
marous

Pateties verby!

Andre

En hulle wil hê ons moet ons wapens inhandig.
Ons sal dan met ons eie wapens vermoor en beroof word.

wraggies

Waar was die sekuriteits maatskappy, hulle beveilig mos deesdae die polisiestasies aangesien hulle dit nie self kan doen nie.

olof

Die polisie se skelms het dit seker gesteel. Daar is baie van hulle – inside job!So duidelik soos daglig.

Piet Pompies

Toe ek die berig lees moes ek op die kalender seker maak dit is nie dalk 1 April vandag. ‘n Siviele vuurwapen lisensie houer moet sy vuurwapen in ‘n kluis toesluit, gedurende my weermag tyd was die vuurwapen kluis ‘n vertrek wat jy nie sommer oop breek nie. Die vuurwapens was so gepak indien jy daar instap sal jy dadelik opmerk as een wapen uit posisie is of een wapen verwyder is.