Vuurwapenwet: ‘Burgers moet hulself kan beskerm’  

Die wysigingswetsontwerp is Vrydag in die Staatskoerant gepubliseer. (Argieffoto ter illustrasie)

Die burgerregte-organisasie AfriForum sê dat hy die voorgestelde wysigingswetsontwerp omtrent die besit van vuurwapens sal beveg – onder meer die verwydering van selfverdediging as ’n rede om ’n vuurwapen te besit.

Maroela Media het vroeër berig dat die wysigingswetsontwerp voorstel dat die wet gewysig word sodat “die aansoeker ’n geldige rede moet verskaf vir die besit van ’n vuurwapen en sodat geen vuurwapenlisensie uitgereik sal word vir selfverdedigingsredes nie”.

Dié wysigingswetsontwerp is Vrydag in die Staatskoerant gepubliseer en die afgelope naweek oopgestel vir kommentaar.

“Die wysigings is irrasioneel en roekeloos veral aangesien dié konsep die vermoë van burgers ontneem om ’n vuurwapen vir selfverdedigingsdoeleindes te besit,” sê Marnus Kamfer, regs-en-risikobestuurder by AfriForum.

“Burgers moet oor die vermoë beskik om hulself en hul gesinne, binne die raamwerk van die wet, teen misdadigers te beskerm.”

Kamfer sê die konsep van die wetsontwerp is ’n aanval op gemeenskappe se weerbaarheid.

“Hierdie konsep, in sy huidige formaat, sal tot gevolg hê dat burgers weerloos gelaat word in ’n land waar die Suid-Afrikaanse Polisiediens reeds ruiterlik erken het dat hy nie oor die vermoë beskik om die burgers van die land teen ’n misdaadvlaag te kan beskerm nie.”

Bheki Cele, minister van polisie, het sowat twee weke gelede die misdaadstatistieke van die vierde kwartaal van die 2020-’21-boekjaar bekendgemaak, waarin hy onder meer aangedui het dat moord en poging tot moord in Suid-Afrika met onderskeidelik 8,4% en 8,7% gestyg het. Plaasaanvalle en -moorde het ook verdubbel vergeleke dieselfde tydperk verlede jaar.

Die DA sowel as die VF Plus het Saterdag hulle kommer en teenkanting vir die wysigingswetsontwerp uitgespreek.

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

26 Kommentare

jongste oudste gewildste
gpsa

Die polisie en staat is gladnie in staat om die vuurwapen register te hanteer nie, nie eers beheer oor wapens in staats besit nie. Omdat hulle geen beheer het nie is die maklikste manier om ontslae te raak van soveel moontlik. Hulle moet die register privatiseer.

Aikie

Ek dink nog steeds ons moet die by die Amerikaanse grondwet gaan kers op steek. Hulle grondwet gee nie soseer die regte van die burger nie, maar beperk in werklikheid die regte van die staat. Gaan lees hom maar op die internet en koekeloer wat hulle regtig sê.

Niklaas

So die kwessie van selfverdediging met lisensie verkryging is ‘n probleem. Sal ek dan eerder meld dat ek nie van my buurman hou nie en aaklige planne beraam om’ n geskil met hom te besleg? Dit kan dalks in die huidige SA my gou instaat stel om lisensie te bekom. Belaglik.

Wakkerslaper

Ek weet bitter min van die gereg en wette af, maar is daar nie ‘n klousule in die Verenigde Nasies se Artikel 51 wat stel dat enige individu (of groep individue) die reg tot selfbeskerming het teen enige vorm van ‘n gewapende aanval?

Hoe is dit van toepassing op Suid Afrika? Beteken dit nie dat elke Suid Afikaner die reg to (gewapende) selfbeskerming het nie?

koos10

Is die volgende rede aanvaarbaar:

Ek wil winkels roof, en transito rooftogte doen, en het die wapen nodig om onskuldige mense te dreig of seer te maak?