Vuurwapenwet: Cele kap terug na kritiek 

Bheki Cele. Foto: Jairus Mmutle/GCIS

Die FW de Klerk-stigting het sy stem gevoeg by dié van ʼn rits ander organisasies en instellings wat sterk ten velde getrek het teen die voorgestelde wysigings aan die Wet op die Beheer van Vuurwapens.

“Die beskerming van burgers word algemeen beskou as die mees fundamentele funksie en plig van enige staat. Maar in die geval van Suid-Afrika is dit ʼn plig wat die staat klaaglik misluk het om uit te voer,” het die stigting in ʼn verklaring gesê.

Die verduideliking deur Bheki Cele, minister van polisie, oor hoekom hy Suid-Afrikaners van die reg wil ontneem om vuurwapens te gebruik om hulself te beskerm, is heeltemal onoortuigend. “Hy voer aan die rede is om die toename in onwettige vuurwapenbesit aan bande te lê.

“Hy probeer klaarblyklik die indruk wek dat wettige vuurwapens – en nie die staat se onbevoegdheid nie – die oorsaak is van verhoogde misdaadsyfers in Suid-Afrika. In plaas daarvan om Suid-Afrikaners te ontwapen en die enigste opsie te verwyder om hulself te verdedig, moet die minister en die SAPD hul eie institusionele mislukkings aanraak ten einde hul mees fundamentele plig uit te voer, naamlik om die land se burgers te beskerm.”

Cele het vroeër in die reaksie op die voorgestelde wysigings gesê Suid-Afrikaners moet troos vind in die feit dat die voorgestelde wysigings nie ligtelik opgeneem is nie en dat uitgebreide navorsing en beraadslagings met verskillende belanghebbendes die voorgestelde wysigings voorafgegaan het.

Hy het gesê dat die wysigings nie geïnterpreteer moet word asof die regering dit oorweeg om sy burgers te ontwapen nie.

“Daar is geen reg om ʼn wapen te dra in ons Grondwet nie en die Wet op die Beheer van Vuurwapens in sy huidige vorm verleen ook geen sodanige reg aan burgers nie. Die besit van ʼn wapen in hierdie land bly ʼn voorreg wat moontlik gemaak word deur die Wet op die Beheer van Vuurwapens.”

Volgens Cele sal die bewapening van burgers nie die land se hoë misdaadsyfer oplos nie en die blote besit van ʼn vuurwapen kan lei tot verhoogde risiko’s vir die vuurwapeneienaar én die mense in sy of haar huishouding. “Hierdie voorgestelde wysiging kan dalk die verskil tussen lewe en dood vir honderde vroue beteken wat in hul eie huise in die kloue van mishandelaars leef.”

Die FW de Klerk-stigting het daarop gewys dat Suid-Afrika se moordsyfer die naashoogste van enige land ter wêreld met ʼn bevolking van meer as vier miljoen is. “Die skokkende werklikheid is dat meer as 500 000 mense sedert 1994 in Suid-Afrika vermoor is. Dit is ongeveer 100 000 meer as die aantal Amerikaanse soldate wat in die Tweede Wêreldoorlog gesterf het.”

Suid-Afrika is ongetwyfeld een van die gewelddadigste lande ter wêreld, het die stigting gesê. “Die staat is duidelik nie in staat om sy primêre plig uit te voer om die lewens van sy burgers te beskerm nie. Ongelukkig is die besit van ʼn vuurwapen vir baie Suid-Afrikaners dikwels die enigste wettige manier om hulself, hul gesinne en besittings te beskerm. Dit is veral die geval met die land se geteisterde boeregemeenskap.”

Volgens die stigting moet die wysigingswetsontwerp ook beskou word in die lig van ʼn aantal verwante verwikkelinge, waaronder die onlangse besnoeiings aan die SAPD se begroting wat miljoene Suid-Afrikaners nog meer kwesbaar vir misdaad sal laat. Die begroting van die BBP-beskermingseenheid is egter tot R1,7 miljard verhoog.

Dokumente word op enige oppervlakte staangemaak by die kantore van die sentrale vuurwapenregister. (Foto: Verskaf).

Die sentrale vuurwapenregister is in chaos met meer as ʼn miljoen onverwerkte aansoeke terwyl daar ʼn reuse-agterstand in DNS-toetse by die polisie se forensiese laboratoriums is.

Die stigting het ook gewys op die onlangse geval in Zandspruit waar die gemeenskap eie reg gebruik het en aangevoer het dit was die gevolg van swak polisiëring.

“Suid-Afrika se astronomiese misdaadstatistieke – veral vir geweldsmisdade soos moord, verkragting, gewapende roof en GBV – bevestig ongelukkig die institusionele onvermoë van die staat om mense te beskerm en die lewens van sy burgers – en veral van sy kwesbaarste bevolkings – te beskerm. ʼn Ontstellende vraag bly staan: Waarom wil die regering, in hierdie toenemend wisselvallige tyd in die evolusie van ons ná-1994-samelewing, sy burgers ontwapen?”

Cele het ook bekend gemaak dat daar reeds derduisende kommentare ontvang is rakende die voorgestelde wysigings. Sedert die beoogde wysigings Vrydag in die Staatskoerant geplaas is, is meer as 17 000 geskrewe besware reeds ontvang.

“Die belangstelling en die groot aantal kommentaar wat tot dusver ontvang is, dui daarop dat Suid-Afrikaners hul stem hieroor laat hoor. Ons doen ʼn beroep op mense om met hierdie momentum voort te gaan. Alle kommentaar sal onder die loep geneem word en dít wat as nuttig beskou word, sal opgeneem word om die bepalings van die wetsontwerp te versterk.”

Die minister het gesê hy is oortuig daarvan dat die wysigingswetsontwerp die sleutel tot ʼn veiliger Suid-Afrika en die wêreld is.

Die wetsontwerp is beskikbaar op die webwerf van die burgerlike sekretariaat vir die polisie en lede van die publiek kan tot 4 Julie 2021 daarop kommentaar lewer.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

88 Kommentare

jongste oudste gewildste
Persheks Adri

Hoedeman jy hou aan krap! Dis nie ‘n voorreg om ‘n wapen te besit nie dis ons grondwetlike reg om onsself te beskerm! Grootste kriminele is reeds in SAPS en weet nie hoe om ons te beskerm nie. Tsek!!!

Jannie van Niekerk

Pleks dat die ou fossiel eerder die BBP Beskermringseenheid tot niet maaak. Dit sal abosluut geen skade wees as die President en sy volle parlemnt nie deur polisie hoef opgepas te word nie.

Pieter

Ek wonder wie het die navorsing gedoen. Die ou kan nie eens sy pligte doen nie. Die is alles n ‘smoke screen’ vir iets anders agter die skerm waarmee hulle hier besig is. Los die wettige vuurwapens uit en begin jou werk doen om die moordenaars en krimenele te vang, want julle ‘score’ lyk baie swak – Comrad. Ons sal veg teen die!

Manie

Ek daag jou uit Cele, kom probeer jy my wettige vuurwapens waarmee ek myself en gesin beskerm afneem, jy moet self kom ne?

Blikkantien

Ons almal weet hoekom hierdie wet gewysig word.