Vyf dood in gru-ongeluk by Theewaterskloof-dam

Die ongeluk het digby die Theewaterskloof-dam plaasgevind (Foto: Rob Beezy, Twitter)

Vyf mense is dood en talle beseer toe ʼn sportnutsvoertuig Dinsdagoggend reg van voor met vragmotor gebots het. Die ongeluk het digby die Theewaterskloof-dam in die Wes-Kaap plaasgevind.

Volgens Jandré Bakker, woordvoerder van die departement van vervoer in die Wes-Kaap, het die ongeluk voor 08:00 op die R321-pad tussen Villiersdorp en Grabouw plaasgevind. Die pad loop oor die Theewaterskloof-dam.

“Volgens ooggetuies het die sportnutsvoertuig ʼn ander motor verbygesteek en kop aan kop met die vragmotor gebots. Die vragmotor het ʼn passasierswa – wat passasiers vervoer het – gesleep,” bevestig Bakker.

“Twee insittendes van die vragmotor en drie van die sportnutsmotor het tydens die ongeluk omgekom.”

Talle beserings is aangemeld. Bakker kon nie bevestig presies hoeveel mense in die ongeluk beseer is nie.

Een baan van die R321 was teen die tyd van publikasie steeds vir motoriste gesluit.

“Ons doen ʼn beroep op motoriste om ander motors verby te steek slegs wanneer dit wettig en absoluut veilig is.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

19 Kommentare

jongste oudste gewildste
Diline

Tragies, 1 mens wat ook vier ander se dood veroorsaak het. Party mense vat groot kanse wat dan op hierdie tragedie uitloop. So onnodig

marius

Waarom word daar nie ‘n beroep gedoen dat diegene wat op sper strepe verby jaag en soos gekke bestuur nie summier tronk toe gestuur word nie ?

Oom Hennie Pennie

Spoed en arrogansie is die groot oorsaak

Dries

Wanneer gaan mens ophou om die dood te tart

JM

Wat maak dit saak of jy 3 of 5 minute later by jou bestemming aankom, maar sodoende jou eie en ander se lewens gered het? Talle onskuldige lewens is al geëis as gevolg van ongeduldige bestuurders.