Vyf ontsnap uit polisievangwa

Argieffoto

Argieffoto

Vyf verhoorafwagtende gevangenes het Maandag uit aanhouding ontsnap op pad na die Kgosi Mampuru-gevangenis in Pretoria.

Kapt. Doniah Mothutsane, woordvoerder van die polisie, het gesê die verdagtes het omstreeks 15:35 uit die polisievangwa ontsnap en word steeds gesoek. “Polisiebeamptes van Bela-Bela (Warmbad) het tien verdagtes van die Bela-Bela-landdroshof na die Kgosi Mampuru-gevangenis vervoer toe vyf daarin geslaag het om op die hoek van Es’kia Mphahlele- en Bloedstraat uit die polisievoertuig te ontsnap,” het sy gesê.

“Daar is vasgestel hulle het op ʼn manier die gaasdraad verwyder en die agterste venster uitgeskop, uit die voertuig gespring en weggehardloop. Die polisie het die gebied gefynkam, maar geen van die ontsnaptes is weer in hegtenis geneem nie.”

Die vyf verdagtes is Liston Baloyi (22), Innocent Mahlalela (40), Sammy Sibiya (23), Justice Moakiri (27) en Diver Mogudu (25). Hulle is almal van gewapende roof aangekla.

Mothutsane het gesê ʼn ondersoek sal gedoen word om te bepaal of enige polisiebeamptes nalatig was en aanspreeklik gehou moet word. Sy het die publiek gewaarsku om nie die verdagtes te nader nie. Omdat hulle as gevaarlik beskou word moet die polisie eerder gekontak word indien hulle gewaar word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

10 Kommentare

Theresa ·

Ja nee – wat sal ‘n mens nou sê (wat gepubliseer sal word)?

Martin ·

Daar bestaan nie so iets nie. Hoe verwyder hulle die gaas en skop die agter venster uit sonder dat die bestuurder dit agterkom? Hy wou dit nie agterkom nie.

Nic Grobler ·

Is daar dalk ‘n eetplek op die hoek van Eskia Mphahlele en Bloedstraat?

Landie ·

Ag nee regtig, dis mos nou pateties verby!! Deesdae baie makliker om uit gevangeneskap te ontsnap as om daar in te kom!!! Soos Theresa sê, mens kan nie eers mooi uitspel wat jy van die situasie dink nie, want dit mag dalk nie gepubliseer word nie!!

Peet Schabort ·

Ek het ook ‘n ‘stokperdjie’ waar ek name versamel van mense wat verband hou met hulle beroepe, beoefening van sport, hulle doen en late ens. Met hierdie onderwerp van misdaad gaan ek beslis neerskryf die name van INNOCENT Mahlalela, JUSTICE Moakiri en DIVER Mogudu want sien, hulle is nie só ‘innocent’ en is nou besig om te ‘duck’ en te ‘dive’ want ‘justice’ vir hulle het net een uiteinde.
Wat ek nie kan verstaan is dat hulle nie aanmekaar geboei word of is dit teen die sg. menseregte-wette ?

irene ·

Hier word ook gepraat van tien gevangenisse. Is dit nie ook overloading nie, vra maar net. Een polisie drywer en dalk een voor by hom met tien gevangenisse? 2 – 10 kan nie werk nie.

Harry ·

Pure slapgatheid, nes die owerheid. Miskien was daar omkoopgeld?

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.