Vyf sterf in ambulans-ongeluk

Vyf mense is dood en een persoon is beseer nadat ʼn ambulans en ʼn motor naby Polokwane in Limpopo gebots het.

“Vyf mense het onherkenbaar verkool in die botsing wat Donderdag plaasgevind het,” het Macks Lesufi, woordvoerder van die departement van gesondheid in Limpopo gesê. Die botsing het in Lebowakgomo, suid van Polokwane, plaasgevind.

“Drie insittendes van die motor en twee in die ambulans is op die toneel dood verklaar. Die bestuurder van die ambulans is na ʼn hospitaal gehaas.” Volgens Lesufi het die ambulans ʼn pasiënt vervoer wat oorgeplaas is na ʼn ander hospitaal.

Lesufi het gesê hulle is nog in die proses om die oorledenes te identifiseer en het bevestig die polisie ondersoek die ongeluk.