Vyf sterf in ambulansrit

Argieffoto

Argieffoto

Die Vrystaatse polisie ondersoek ʼn saak van strafbare manslag en bewerings van moontlike alkoholgebruik nadat ʼn staatsambulans en ʼn staatslykswa Sondag in die vroeë oggendure naby Viljoenskroon gebots en die lewe van vyf mense geëis het.

Kapt. Stephen Thakeng, polisiewoordvoerder, het Donderdag aan Maroela Media gesê die botsing het omstreeks 02:30 op die R76-pad sowat 15 km buite die dorp plaasgevind.

“Die ambulans en die lykswa het in teenoorgestelde rigtings gery. Die ambulans was met ʼn pasiënt van Potchefstroom af op pad na Kroonstad, terwyl die lykswa van Kroonstad se kant af gekom het,” het Thakeng gesê.

Thakeng het gesê daar was agt mense, die bestuurder en pasiënt ingesluit, in die ambulans. In die lykswa was die bestuurder en sy assistent.

Die voertuie het mekaar reg van voor getref. Die bestuurder van die lykswa is op slag dood en sy assistent het oorleef. Die ambulansbestuurder, ʼn 68-jarige ma en haar 35-jarige dogter en ʼn onbekende man is in die ambulans dood.

“Dit is nie duidelik waarom die onbekende man in die ambulans was nie. Daar word vermoed dat hy ʼn vriend van die ambulansbestuurder is.”

Die pasiënt, twee ambulansassistente en ʼn onbekende vrou het oorleef. Dit is ook nie duidelik waarom dié vrou in die ambulans was nie.

Die oorlewendes is na nabygeleë hospitale gehaas vir mediese behandeling.

“Ons kan nie in dié stadium gerugte bevestig of van die ambulans se insittendes onder die invloed van alkohol was nie. Dit maak deel uit van ons ondersoek wat steeds voortduur,” het Thakeng gesê.

Hy het gesê weens die sensitiwiteit van die saak het die polisie besluit om nie in dié stadium die name van die oorledenes bekend te maak nie.

Die Vrystaatse departement van gesondheid het ook sy eie afsonderlike ondersoek na die ongeluk van stapel gestuur en het onderneem om die families van die slagoffers by te staan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

13 Kommentare

Jacques ·

Hoekom? Want hulle ry taxi met die ambulanse. Dis hoekom. Hulle is ongelukkig uitgevang

vicky ·

Ek stem saam. Die onbekende mense is in die ambulans omdat dit mos ook n taxi deesdae is.

Dee ·

Taxi-ry met ‘n ambulans behoort nie moontlik te wees as boekwerk gedoen word nie. Daar behoort immers ‘n logbook te wees met betrekking tot ritte, brandstof, tye en instandhouding. Dit kan tog nie so sonder beheer te wees dat petrol bloot keer op keer ingegooi kan word na willekeur, nie.

Winston ·

Het gehoor van n SAPD voertuig in die Kalahari streek wat vir nege maande geloop het sonder n inskrywing in die state. Bloulig taxis, rooilig taxis. Wie gee om?

Malinda ·

Nou wat gaan die regering daaromtrent doen, seker net skouertjies optrek en se job creation

Piet Pompies ·

Brandewyn het nie brieke,…….Petrol en Brandewyn meng nie……..al ry jy ‘n kar, bakkie of ambulans.
Dit is ‘n kombinasie vir dood.

pop ·

Al die staatsvoertuie is taxis. En mens kan maar fotos neem en aanstuur, daar gebeur niks. Is aanvaarbaar.

shannon ·

Die pasiënt het dus beswyk aan sy (vêrdere) beserings reeds voor sy aankoms by die hospitaal ?
Ek moet kyk of my mediese fonds dit dek..

Radie ·

N nuwe regeing in ons land gaan een groot gemors moet uit sorteer.Dit voel asof dit nag geword het in Suid Afrika die mooiste beste land op aarde maar deesdae een duister land.
N socalled president wat n voorbeel van korupsie ondersteen en selfs toepas wat n babana republiek!!!!!

Net Gewonder ·

Die polisie maak nie die name bekend nie, want dan kan hulle dit nie meer toe smeer nie.

arie plaasboer ·

Die berig laat my dink aan `n geval waarvan ek gehoor het.
`n Twee sitplek vliegtuig het in `n begraafplaas neergestort en die grond erg omgekrap.
Soek en redding spanne was gou op die toneel.
Teen sononder is gerapporteer dat hulle reeds tien lyke gekry het, die verwagting is dat daar oornag meer gevind sal word.

Daar is gewoonlik drie in `n lykswa, maar in hierdie geval is hoeveel gevind?

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.