Vyf sterf in gru-ongeluk op R44

Vyf mense, insluitend ‘n baba, is Saterdagaand dood in ‘n botsing reg van voor op die R44 in Stellenbosch in die Wes-Kaap.

Luyanda Majija, woordvoerder van ER24, sê die twee motors het na die botsing aan die brand geslaan . Sy sê met paramedici se aankoms op die toneel was brandbestryders besig om die vlamme te blus.

Majija sê daar was drie volwassenes en ‘n baba in die een motor en een volwassene in die ander motor. Sy al die oorledenes is onherkenbaar verkool in die motors.

Die pad was lank vir verkeer gesluit. Die oorsaak van die ongeluk word ondersoek.