Vyf mense het in die ongeluk gesterf. (Foto: Dept. van vervoer, Limpopo)
Vyf mense is dood in ʼn kop-teen-kop-botsing tussen twee bakkies in die Sekhukhune-distrik in Limpopo.
Mike Maringa, woordvoerder van die departement van vervoer in Limpopo, sê die ongeluk het Saterdagaand tussen twee bakkies op die Maleoskop-pad naby die Blue Ridge-myn gebeur.
Maringa sê die bestuurder van die Ford-bakkie het glo beheer om ʼn skerp draai verloor en reg van voor teen ʼn Isuzu-bakkie gebots.
“Albei bestuurders en drie passasiers is tydens die botsing dood. Vier van die oorledenes was in die Isuzu-bakkie, terwyl die bestuurder van die Ford alleen in die voertuig was.
Die slagoffers is in ‘n kop-teen-kop-botsing dood. (Foto: Dept. van vervoer, Limpopo)
“Die voorlopige ondersoek dui daarop dat bestuurdermoegheid moontlik tot die ongeluk aanleiding gegee het,” sê Maringa.
Mavhungu Lerule-Ramakhanya, LUR vir vervoer en gemeenskapsveiligheid in die provinsie, het sy medelye met die familie van die slagoffers betuig.
Lerule-Ramakhanya het ook haar kommer uitgespreek oor die voortgesette verlies aan lewens op die provinsie se paaie, “veral oor naweke weens roekelose bestuur en spoed”.
Sy het ʼn beroep op motoriste gedoen om stadiger te ry.
Dit is absoluut verskriklik. Sterkte aan die families .
Verkeerde plek op n verkeerde tyd. Simpatie met die families.