Vyf vas vir moord op polisielid

Argieffoto Foto: SAPD, Facebook

Argieffoto Foto: SAPD, Facebook

Vier mans en ʼn vrou is in hegtenis geneem in verband met die moord op ʼn Wes-Kaapse polisiebeampte.

“Vyf verdagtes tussen 26 en 31 jaar oud is vroeg Saterdagoggend aangekeer,” het kol. Tembinkosi Kinana, woordvoerder van die polisie, gesê. “Die vyf is in Mfuleni in hegtenis geneem.”

Sersant Xolisa Mlindwa se liggaam is Maandag langs sy motor in Faureweg in Mfuleni aangetref. Hy het ʼn paar skietwonde gehad. Mlindwa (41) was by die Gugulethu-polisiestasie gestasioneer.

“Die polisie het beslag gelê op twee vuurwapens tydens die inhegtenisneming,” het Kinana bygevoeg. “Een daarvan was Mlindwa se dienswapen.”

Die verdagtes is tans in aanhouding en sal na verwagting Maandag in die Blue Downs-landdroshof verskyn op aanklag van moord en die besit van ongelisensieerde vuurwapens.

Twee polisiebeamptes, sers. Sibongile Ngcawuzele (37) en konstabel Monwabisi Khaka (33) is verlede Sondag in Nyanga doodgeskiet terwyl hulle aan diens was. Hul dienspistole is ook gesteel. Kinana het Sondag gesê daar is nog nie enige vordering met dié saak gemaak nie. -SAPA

Lees ook:
Vyf polisiebeamptes in vyf dae vermoor

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae