Vyf vas vir olifanttande van meer as halfmiljoen rand

Argieffoto

Vyf mense van Lefaragatlha buite Rustenburg in Noordwes is in hegtenis geneem vir die onwettige besit van olifanttande.

Lt.kol. Amanda Funani, woordvoerder van die polisie, sê die polisie kon dié mans in hegtenis neem ná ʼn wenk van die gemeenskap oor die onwettige verkoop van ivoor.

Volgens Funani is die groep in ʼn huis in Lefaragatlha vasgetrek. “Die polisie het die huis en die perseel deursoek en twee olifanttande, met ʼn geraamde waarde van R600 000, in die kattebak van ʼn Toyota Vios met ʼn Botswana-registrasienommer gekry,” sê sy.

Sy sê die verdagtes kon nie aan die polisie verduidelik waarom hulle olifanttande in hul besit het nie, en is in hegtenis geneem.

Volgens haar sal al vyf verdagtes Donderdag in die landdroshof in Bafokeng verskyn.