Vyfde hawelose man in Pta vermoor

Die omgewing naby die Unisa-kampus. Foto: Izelle Jacobs / Unisa

Die liggaam van ʼn vyfde hawelose man is Woensdagoggend by ʼn bushalte in Muckleneuk in Pretoria gevind.

Volgens brig. Mathapelo Peters, polisiewoordvoerder, is die man se liggaam by die bushalte sowat 400 meter van die Universiteit van Suid-Afrika (Unisa) se hoofkampus in die stad gevind.

Vyf liggame is binne net ʼn paar weke in verskillende dele van Muckleneuk, naby die Pretoriase middestad, gevind. Al vyf van die slagoffers was mans, middeljarig, haweloos en is deur die nag vermoor, het Peters gesê.

Lede van die polisie se misdaadintelligensie-eenheid, speurders en kenners, wat patoloë en kriminele sielkundiges insluit, is aangesê om die ondersoek na die moorde te prioritiseer.

Maroela Media het vroeër berig twee mense is dood aangetref in Muckleneuk se gewilde Magnoliadal-park. ʼn Man is ook dood gekry in ʼn veld naby die Mearspark-treinstasie, ongeveer 2,8 km van dié park. Die liggaam van die vierde slagoffer is gister op ʼn sypaadjie op die hoek van Justice Mahomed (Walker/Charles)‑ en Troyestraat gevind.

Die polisie in Pretoria het sedertdien ʼn beroep op hawelose mense gedoen om in groepe te slaap.

“Sonder om paniek onder gemeenskappe in veral die Muckleneuk-omgewing te saai, wil die polisie die publiek maan om waaksaam te wees teen hierdie nagtelike bekruiper wat op weerloses teer. Ons, as die polisie, moet dadelik werk hiervan maak en verseker dat dié waansin beëindig word,” het lt.genl. Elias Mawela, Gautengse polisiehoof, gesê.

Mawela sê die polisie probeer intussen skuilings vir haweloses in die gebied reël.

Enigiemand met inligting rakende die moorde word versoek om dit by hul naaste polisiestasie aan te meld.