Vyfjarige tweeling in kas gevind ná ‘ontvoering’

Die vyfjarige tweeling was sowat twee weke lank vermis.

ʼn Vyfjarige tweeling wat byna twee weke lank vermis was, is nou in ʼn plek van veiligheid nadat hulle Saterdagaand by ʼn huis in Boksburg opgespoor is.

Die private ondersoeker Mike Bolhuis het gesê die seuntjie en dogtertjie se tannie het die ondersoekspan se hulp ingeroep, nadat die kinders, wat in hul grootouers se sorg is, se pa hulle nie ná ʼn besoek teruggeneem het huis toe nie. Hulle was sedert 2 November spoorloos.

Die kinders se ma is twee jaar gelede in ʼn motorongeluk dood en daar was sedertdien ʼn informele reëling tussen die kinders se pa en grootouers oor toesig. Die grootouers woon op Mashishing (Lydenburg), terwyl hul pa deesdae in Gauteng woon en werk.

Nadat die pa die kinders vir ʼn besoek opgelaai het, het hy met hulle verdwyn.

Bolhuis het gesê lede van sy ondersoekspan het die pa – én die tweeling – Saterdagaand by ʼn huis in Boksburg opgespoor waar hy saam met hulle in ʼn kas probeer skuil het. Die kinders was fisiek ongedeerd.

Hy het gesê daar is in samewerking met die polisie en maatskaplike werkers besluit om die kinders in ʼn plek van veiligheid te plaas terwyl die kwessie oor wie hul wettige voog is, uitgestryk word.

Volgens Bolhuis voer die man nou boonop aan dat hy nie die kinders se biologiese pa is nie en dat dié die laaste keer tydens hul ma se swangerskap kontak met die familie gehad het.

Die man is ná sy inhegtenisneming Saterdag aangekla van ontvoering en het intussen Maandag in die Boksburg-landdroshof verskyn. Hy bly in aanhouding, het Bolhuis gesê.

Hy het gesê die kinders gaan ook nie goedsmoeds aan die familie terugbesorg word voordat ʼn omvattende ondersoek na hul omstandighede afgehandel is nie. “Vir ons gaan dit oor die welsyn van die kinders. Hulle moet veilig wees,” het hy gesê.

Bolhuis het gesê in sy ervaring word familielede betrek by verreweg die meeste ontvoeringsklagtes. Hy het gesê wanneer ʼn hofbevel of skikkingsooreenkoms, of selfs ʼn informele reëling, verontagsaam word wat betref toesig oor kinders, kan iemand in só ʼn geval van ontvoering aangekla word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
Sirkus

Kinders is verseker nie veilig in Suid Afrika se welsyn sorg nie…

The Oracle

Opskrif van berig is misleidend…

Kas

Uitstekend werk Mnr. Bolhuis.Dankie vir jou goeie werk.Ek glo die kinders verdien nie so “n pa”nie.Gee hulle vir mense wat vir hulle liefde sal gee en ‘n standvastige lewe sal verseker.Dankie grootouers dat julle vir die engeltjies omgegee het.

Ronel

Wel gedaan MikeBolhuis. Ons kan jou knoppie enige tyd druk. Nou sal pappa als ontken hoekom as dit nie sy kiddies is nie. Hulle dan geneem

JH

Mag daai 2 kindertjies verder opgroei by wie ookal die beste na hulle gaan kyk.