Waarskuwings uitgereik oor donderstorms

(Grafika: @SAWeatherServic/Twitter)

Oranje vlak 5- en geel vlak 2-waarskuwings vir erge donderstorms is uitgereik oor die sentrale en oostelike dele van die land.

Die Suid-Afrikaanse Weerdiens het ʼn geel vlak 2-waarskuwing uitgereik vir die oostelike en sentrale dele van die Vrystaat en Noordwes, suidwestelike dele van Limpopo, noordelike dele van Gauteng, westelike en sentrale dele van die Mpumalanga-Hoëveld en oostelike en suidelike dele van KwaZulu-Natal.

Oranje vlak 5-waarskuwings vir erge donderstorms is uitgereik vir die oostelike dele van die Vrystaat, suidoostelike dele van Noordwes, die Gauteng-Hoëveld, suidelike dele van Mpumalanga en noordwestelike dele van KwaZulu-Natal. Buiten weerlig en oorstromings word klein hael en sterk wind ook in dié gebiede verwag.