Watergehalte ʼn tydbom – AfriForum

Argieffoto

Die burgerregte-organisasie AfriForum is bekommerd oor die swak bestuur van water in Suid-Afrika ná die uitslae van sy nasionale watermoniteringsveldtog van 2014, bekend as die Blou- en Groendruppel-takprojek, bestudeer is. Meer as 100 AfriForum-takke dwarsoor die land het deelgeneem.

Volgens Julius Kleynhans, hoof van omgewingsake by AfriForum, kon die probleme met drinkwater vinnig reggestel word, maar rioolwater hou beduidende gesondheidsrisiko’s vir gemeenskappe dwarsoor Suid-Afrika in. “Nalatigheid by beplanning, bestuur en die instandhouding van infrastruktuur lei tot grootskaalse besoedeling van ons waterbronne. Dit kan beduidende risiko vir mense en die gemeenskap se gesondheid inhou,” het Kleynhans gesê.

Bloudruppel

Die Bloudruppel-uitslae het 11 munisipaliteite uitgewys waar drinkwater nie aan nasionale standaarde voldoen het nie. Dit was die volgende:

1. Hertzogville – Tokologo Plaaslike Munisipaliteit – Die monsters het 14 mg nitrate per 100 ml water bevat, wat methemoglobinemie in babas kan veroorsaak. Dit volgens die Suid-Afrikaanse Riglyne vir Watergehalte volume 1: Huishoudelike watergebruik, tweede uitgawe, 1996 (SARWG)
2. Kareedouw – Kou-Kamma Plaaslike Munisipaliteit – 10 tellings E. Coli/ 100 ml water;
3. Stormsrivier – Kou-Kamma Plaaslike Munisipaliteit – 23 tellings E. Coli/ 100 ml water;
4. Polokwane – Polokwane Plaaslike Munisipaliteit – 4 tellings E.coli/100 ml water;
5. Stella – Naledi Plaaslike Munisipaliteit – 140 tellings E.coli/100 ml water;
6. Standerton­ – Lekwa Plaaslike Munisipaliteit – Kleur voldoen nie aan standaard nie, maar veilig om te drink;
7. Swartruggens – Kgetlengrivier Plaaslike Munisipaliteit – 36 tellings E.coli/100 ml water;
8. Vryburg – Naledi Plaaslike Munisipaliteit – 4 tellings E.coli/100 ml water;
9. Witbank – eMalahleni Plaaslike Munisipaliteit – 11 mg totale organiese koolstof;
10. Coligny – Ditsobotla Plaaslike Munisipaliteit – 4 tellings E.coli/100 ml water;
11. Mafikeng – Mafikeng Plaaslike Munisipaliteit – 2 tellings E.coli/100 ml water; en
12. Delareyville – Tswaing Plaaslike Munisipaliteit – 12 mg nitrate.

Ingevolge SANS:241 nasionale standaard mag daar geen E.coli in drinkwater wees nie.

Groendruppel

Hierdie uitslae het groot kommer gewek oor verantwoordelike watergebruik en die instandhouding van dienste deur die regering. “Tot dusver het 43 watersuiweringsaanlegte in ons projek aan die minimum standaarde vir rioolwater voldoen. 33 voldoen nie, wat ʼn bedreiging vir menslike gesondheid, voedselsekerheid en die omgewing inhou,” het Kleynhans bygevoeg.

Suid-Afrika se nasionale standaarde vir watergehalte maak voorsiening vir 1000 eenhede van E. coli per 100 ml water in behandelde riool. Munisipaliteite wat nie hieraan voldoen nie, sluit in:

Die uitslag van die 2014-verslag sal gebruik word om dieselfde infrastruktuur en ander in 2015 te meet.

“Die projek het die gehalte van drinkwater en behandelde water dwarsoor die land getoets om nakoming van nasionale standaarde te verseker. Die monsters is deur onafhanklike SANAS-geakkrediteerde laboratoriums getoets en die uitslae is geanaliseer,” sê Kleynhans.

AfriForum sal dwarsoor Suid-Afrika met al die hulpbronne tot sy beskikking optree om te verseker dat probleme onmiddellik opgelos word ten einde te verseker dat hierdie kosbare hulpbron bewaar word. Briewe word tans op munisipaliteite beteken wat nie voldoen aan die standaard nie. SMS die naam van jou dorp na 32277 om AfriForum te ondersteun in hierdie inisiatief om die volhoubare gebruik en beskerming van ons waterbronne te verseker. (R1/SMS)

Klik hier om die volledige verslag te sien.