Waterkrisis: ‘Suid-Afrikaners gebruik te veel water’

Die minister van water en sanitasie, Lindiwe Sisulu (Argieffoto: GCIS)

Suid-Afrikaners gaan hul benadering tot waterverbruik moet aanpas as die land die sogenaamde Dag Zero wil voorkom.

Die minister van water en sanitasie, Lindiwe Sisulu, het Maandag gewaarsku watertekorte staar groot dele van Suid-Afrika in die gesig. Behoorlike reën word nie voor Desember verwag nie en dam- en reservoirvlakke daal voortdurend. Volgens Sisulu is Suid-Afrika een van die 30 droogste lande ter wêreld. Meer as 60% van die land se water word vir landbou gebruik, wat 27% vir die land se nagenoeg 58 miljoen inwoners laat.

Verouderende infrastruktuur en wanbestuur veroorsaak boonop groot probleme wat betref doeltreffende waterbestuur.

Volgens Sisulu ervaar Suid-Afrika in dié stadium waarna verwys word as waterstres. “Die situasie is baie ernstig, maar daar is nie rede tot paniek nie. Alles is onder beheer.

“ʼn Harde werklikheid staar ons in die gesig en ons moet onmiddellik begin om Suid-Afrika [water]rampbestand te maak. Dit is van die uiterste belang,” het sy gesê.

Die minister sê Suid-Afrika kan niks aan veranderende weerpatrone doen nie, maar moet die hulpbronne wat beskikbaar is, spaarsaam gebruik.

Sipho Mosai, uitvoerende hoof van Rand Water, sê verbruik het bloot onvolhoubaar geword. Die grootmaatwatervoorsiener het reeds beperkings in verskeie gebiede ingestel.

In sy watervoorsieningsgebied het verbruik na nagenoeg 5 miljard liter per dag opgeskiet, waar dit voorheen nagenoeg 4,3 miljard liter was. Waterbeperkings geld ook reeds in verskeie dele van Rand Water se voorsieningsgebied.

(Foto: Pixabay)

Verbruikers hier gebruik gemiddeld 320 liter per persoon per dag, terwyl die internasionale gemiddeld 170 liter per persoon per dag is, het Mosai gesê. Volgens hom het navorsing bevind dit is boonop heeltemal moontlik om met 25 liter water per persoon per dag oor die weg te kom. As dié syfer selfs na 100 liter per persoon per dag opgestoot word, is daar steeds genoeg water vir almal.

“As ons drinkwater gebruik vir drinkwater, behoort alles in orde te wees. Verbruikers gebruik water vir ander doeleindes as drinkwater. Die grootste gedeelte word gebruik om tuine nat te lei en swembaddens mee op te vul,” het Mosai gesê.

Hy het gepleit by mense om hul verbruik te verminder en sê as 500 miljoen liter water per dag bespaar kan word, beperkings moontlik verslap kan word.

“Elke druppel tel. As elke huishouding saamwerk, is daar genoeg water,” het Mosai gesê.

Volgens Sisulu gaan sogenaamde beurtwater, soos die gehate beurtkrag, nét ingestel word as die huidige tempo van verbruik nie verminder nie. “As ons by die beperkings hou, gaan ons nie daardie punt bereik nie,” het sy gesê.

Dhesigen Naidoo, hoof van die waternavorsingskommissie, het gesê waterinfrastruktuur gaan voortaan op die hoogste vlak onderhou moet word om te voorkom dat water verlore gaan. “Dit is heeltemal onaanvaarbaar dat Sipho [Mosai] se mikpunt 500 miljoen liter water per dag is, terwyl daar van 41% van water in die stadstreekskompleks glad nie rekenskap gegee word nie.”

Naidoo het gesê nuwe, moderne infrastruktuur is nodig om uitdagings die hoof te bied en dat water verskeie kere weer gebruik moet word voordat dit eindelik na die bron terugkeer.

“Raak gewoond daaraan om in Suid-Afrika te woon. Engelse kontreituine werk nie in Johannesburg nie. Ons benodig Suid-Afrikaanse tuine wat veel meer waterwys is.”

Sisulu het ook onderneem om meer inligting oor die departement se sogenaamde watermeesterplan aanstaande maand bekend te maak.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

68 Kommentare

jongste oudste gewildste
Leon

Water verbruik sal sekerlik 25% minder wees indien beter onderhoud aan lekkende waterpype gedoen word.

DG

Nog ‘n voorbeeld waar wanbestuur nou almal se krises word… Eish

Annoniem

Suid Afrika is mos die brood-mandjie van die vasteland, so, hou die grense oop… Hoe meer siele hoe meer vreugde… Ons land sal mos eerder vir ons bure se burgers ‘n heenkome wil wees VOOR ons na onsself omsien… en stadig maar seker boet ons vir onnosele besluite.

Hans

Al gehoor van water harvesting, hoekom word mense nie betaal om droeë boorgate te rehab om afloop stormwater te herlei nie. Ag maar nee dis veel makliker om riool in riviere in te laat loop.

Joe

Ja kom Zimbabwe , Kongo, Somalie, Uganda, ….kom kom….ons het mos BAIE reserwes……EFF’ers wil julle almal hier he…hulle het mos baie VBS geld so kan gou land uit as nood druk…