Weduwee op Vrystaat-plaas gemartel, verkrag

Argieffoto: Reint Dykema

Argieffoto: Reint Dykema

ʼn 58-jarige weduwee van die Vrystaat is Sondagmiddag op haar plaas naby Harrismith aangeval, gemartel en vermoedelik verkrag.

Sers. Mmako Mophiring, provinsiale polisiewoordvoerder, het Maandag aan Maroela Media gesê die aanval het tussen 16:00 en 17:00 plaasgevind.

“Twee onbekende mans het die vrou by haar huis ingewag. Hulle het haar oorval toe sy teruggekeer het nadat sy sake op Bethlehem gaan doen het,” het Mophiring gesê.

Die verdagtes het die vrou, wat glo alleen op die plaas woon, in die huis in gedwing waar hulle haar met kledingstukke vasgebind het.

“Hulle het haar verskeie kere met ʼn mes gesteek en met ʼn warm strykyster gebrand en aangedring op geld. Sy het vir hulle gesê sy het nie baie geld nie, net dit wat sy by haar gehad het.”

Die mans het haar glo ook verkrag voordat hulle met die vrou se wit Mahindra-bakkie gevlug het. Hulle het die geld wat sy by haar gehad het en ʼn selfoon gesteel.

Sy kon haarself ná die aanval loskry en het hulp ontbied.

Chris Botha, woordvoerder van Netcare 911, het gesê die vrou het ernstige beserings opgedoen en is vir steek- en brandwonde behandel. “Sy is na ʼn privaathospitaal op Ladysmith geneem vir verdere behandeling,” het Botha aan Maroela Media gesê.

Mophiring het gesê niemand is nog in verband met die voorval in hegtenis geneem nie en die slagoffer se voertuig is ook nog nie gevind nie.

“Ons doen ʼn beroep op die publiek wat ʼn verdagte wit Mahindra-bakkie met Vrystaat-nommerplate  sien, om hul naaste polisiestasie te bel. Ons kan ongelukkig nie die bakkie se nommerplaat bekend maak nie, om die slagoffer se identiteit te beskerm.”

Die Harrismith-polisie ondersoek ʼn saak van poging tot moord, huisroof en verkragting. Mense met meer inligting oor die voorval, kan die stasie by 058 624 1000 bel.

Lees die opvolgberig hier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

69 Kommentare

jongste oudste gewildste
Linda

Dit is so tragies, maar ek wil tog ‘n vraag vra. HOEKOM bly vrouens ALLEEN op plase? Dit is mos nou regtig moeilikheid soek.

ig

Linda en sou sy veiliger gewees het om in die dorp te bly ?NEEE.

ladybug

1. Hoekom bly sy alleen?
2. As sy alleen bly hoekom het sy nie ‘n vuurwapen nie? En as sy ‘n vuurwapen het, hoekom dra sy dit nie by haar nie?
3. Kyk nou die gemors?
4. wat is die registrasie nommer van die Mahindra bakkie?

Danie Kok

Linda, ek wil tog ‘n vraag aan jou vra. HOEKOM kan vroue nie alleen op plase bly nie? HOEKOM vra jy nie eerder aan die misdadigers WIE aan hulle die reg gee om andere se regte van hulle te ontneem nie? HOEKOM reken jy dat die vrou wat aangeval is “moeilikheid” soek? HET sy geen reg om veilig te voel by haar huis nie?

Bruno Stef

Mag ons verneem wat die aanvallers en die slagoffer se se ras is die hele berig klink vir my n wegskram en opsetlike weerhouding van feite om watter rede wonder ek.