Die polisie in Klerksdorp, Noordwes, het ʼn grootskaalse soektog van stapel gestuur ná ʼn vrou ʼn week oue babadogtertjie by ʼn winkelsentrum gesteel het.
Lt.kol. Amanda Funani, woordvoerder van die polisie, sê die babadogtertjie is Donderdag ontvoer.
“Die 17-jarige ma het verlede Maandag by haar huis geboorte gegee en die baba is Donderdagoggend in die Klerksdorp-hospitaal opgeneem vir ʼn ondersoek. Sy is omstreeks 14:00 ontslaan,” sê Funani.
“ʼn Vrou het die ma buite die hospitaal genader en gevra of sy vir die ma tekkies kan koop. Die ma het plakkies aangehad.”
Die ma het na bewering saam met die vrou na ʼn winkelsentrum gegaan en die vrou het vir die ma geld gegee om vir haar tekkies te gaan koop, terwyl sy by die babadogtertjie agtergebly het.
“Toe die ma uit die winkel kom, was daar geen teken van die vrou of haar babadogtertjie nie.”
Die ma het ʼn saak van ontvoering by die polisie aanhangig gemaak.
Die vermeende ontvoerder is sowat 1,65 m lank en praat Setswana. Sy het ten tyde van die ontvoering ʼn swart denimbroek en ʼn swart-en-pienk top aangehad.
Enigiemand met meer inligting om die ma met haar baba te herenig, word versoek om sers. Kenny Ntshekane by 082 568 6909 te bel of die Stop Misdaadnommer by 08600 10111 te skakel.
Hoe op aarde los jy jou week oue babatjies alleen by ‘n wildvreemde persoon. Nietemin, ek is seker die ma sit met genoeg skuldige gevoelens om nog kritiek van my af te kry. Ek hoop regtig hulle vind die babatjie…
miskien dop hou en kyk vir nog 9 ?
Waar ‘n rokie trek brand ‘n vuurtjie