‘Wêreldmagte se dreigemente breek die protokol’

Minister Lindiwe Sisulu (Foto: Verskaf/Departement van internasionale betrekkinge en samewerking/Katlholo Maifadi)

Lindiwe Sisulu, minister van internasionale betrekkinge en samewerking, het haar departement opdrag gegee om in gesprek te tree met die vyf ambassadeurs wie se lande glo ʼn memorandum oor korrupsie en ander dreigemente aan pres. Cyril Ramaphosa gestuur het.

Die VSA, Verenigde Koninkryk, Duitsland, Nederland en Switserland het ʼn gesamentlike memorandum aan Ramaphosa gerig rakende die bedreiging wat misdaad, twyfel oor eiendomsreg, Swart Ekonomiese Bemagtiging (BEE), korrupsie en ander bedreigings vir die regsorde, vir buitelandse beleggings inhou.

Dié vyf lande verteenwoordig die oorsprong van 75% van direkte buitelandse beleggings in Suid-Afrika.

Sisulu sê haar departement neem “met teleurstelling kennis” van die memorandum wat aan die kantoor van die president gestuur is. “Dit is teenstrydig met diplomatieke praktyk,” het die departement Sondag in ʼn verklaring gesê.

Die vyf lande het gewaarsku dat Ramaphosa se veldtog om buitelandse beleggings te bekom, onsuksesvol sal wees as hy nie optree teen oortreders van staatskaping, korrupsie en ander misdaad nie.

Die departement van internasionale betrekkinge het in sy verklaring gesê kragtens aanvaarbare diplomatieke protokol en praktyk, word daar van diplomatieke sendings verwag om deur ʼn diplomatieke nota, via die departement, met die regering te kommunikeer.

Alle ambassades, streeks- en internasionale organisasies in Suid-Afrika is bewus van dié protokol en wêreldwye gebruik. “Suid-Afrikaanse diplomatieke sendings oorsee maak deurgaans van dié protokol gebruik indien amptelike kommunikasie aan die onderskeie buitelandse ministeries gestuur moet word,” lui die verklaring.

“Die Suid-Afrikaanse regering verskerp sy poging om ekonomiese betrekkinge met verskeie lande te verbeter en uit te brei en is tot dusver tevrede met die entoesiastiese reaksie. Alle kwessies wat deur beleggers aangeroer word, word deur die onderskeie staatsinstansies getakel.

“Ons is tevrede dat alle takke van ons demokratiese staat, insluitend staatsagentskappe, ywerig besig is om hul onderskeie mandate na te streef om ons huidige uitdagings te pak,” het die departement bygevoeg.

“Minister Sisulu het die departement opdrag gegee om die kwessies in die korrespondensie met die betrokke ambassadeurs te bespreek en om aanvaarbare protokol te benadruk. Die departement wil graag alle diplomatieke sendings in Suid-Afrika aanmoedig om amptelike korrespondensie deur behoorlike diplomatieke kanale aan te stuur.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

128 Kommentare

jongste oudste gewildste
DS

Julle volg nie “menslikheids” protokol met die plaasmoorde, grondonteining en die BEE en kwotas nie so boe-hoe huil maar lekker. Bly daar is lande wat bereid is om betrokke te raak. Kry vir julle ANC!

Deon

Kyk hoe bewe die 5 lande se bene. Die hoendertjies kom huis toe om te braai, suster. Hou op baklei met die diplomate en doen iets aan die saak. Kan dit so moeilik wees, selfs vir die ANC?

MCD

Leë blikke maak die grootste lawaai. Lindiwe Sisulu jy het altyd iets te sê. Hoog tyd dat reg en regverdigheid geskiet. Dit is net die ANC wat in die hele wêreld regkry om ‘n land met korrupsie en onregverdigheid tebestuur.

Basjan

Geagte minister Lindiwe Sisulu, die buiteland het agtergekom dat julle besig is om onwaarhede (om dit sagkens te stel)die wêreld in te stuur. Daar is ‘n spreekwoord wat sê: “Julle is besig om perde****** as vye te verkoop.” Wees verseker die buiteland glo julle nie meer nie.

Roelfie

Dit wys net hoe ernstig daai lande voel oor alles wat in die RSA gebeur.