Werker moet luister hoe boer aangerand word

Riaan Scheepers by sy drie kinders, Bianca, Simone en Christo. Foto: Verskaf

ʼn Werker wat Saterdagoggend saam met Riaan Scheepers (62) op ʼn plaas in die Alexandria-omgewing in die Oos-Kaap deur twee aanvallers aangehou is, is baie getraumatiseerd nadat hy geblinddoek moes luister hoe Scheepers erg deur die aanvallers aangerand word.

Bianca Scheepers, Riaan se dogter, het Sondagmiddag aan Maroela Media gesê haar pa is steeds in ʼn kritieke toestand in die waakeenheid van die Netcare Greenacres-hospitaal in Port Elizabeth. “Hy word nie onder verdowing gehou nie, maar hy slaap nog die hele tyd. Ek dink dit is maar weens sy erge kopbeserings en die skok dat hy net nou slaap,” het sy gesê.

Volgens Bianca boer haar pa al byna sy lewe lank en is hy al 27 jaar op dié plaas waar hy met vleisbeeste boer. Sy vertel Scheepers en die werker was Saterdagoggend die enigstes op die plaas toe die aanval gebeur het. Bianca het om 08:10 ʼn selfoonboodskap van haar pa af gekry en vermoed dus dat die aanval tussen 08:10 en 09:00 moes gebeur het.

“Hulle het net teruggekom by die huis en my pa het in die huis ingestap toe die werker hom hoor skree. Nog voordat hy iets kon doen, het een van die aanvallers hom oorval en hom in die huis in gedwing. Daar is hy en my pa albei in die sitkamer vasgebind en die aanvallers het iets oor die werker se oë gesit dat hy nie kon sien wat gebeur nie.”

Die werker het gehoor hoe die aanvallers vir Scheepers aanrand voordat hulle uiteindelik met ʼn selfoon, ʼn rewolwer en ʼn bakkie op die vlug geslaan het. Die bakkie is later die dag teruggevind.

Die werker kon daarin slaag om homself los te wikkel en het na die bure gehardloop om hulp te ontbied. Scheepers is na ʼn hospitaal in Port Alfred gehaas voordat hy na die hospitaal in Port Elizabeth oorgeplaas is. Die werker was ongedeerd, maar erg getraumatiseerd deur die gebeure.

Riaan Scheepers. Foto: Verskaf

“My pa het al sy beserings aan sy kop opgedoen. Sy gesig is baie erg gekneus en geswel. Hy het een kneusplek op sy arm ook, dalk waar hulle hom vasgehou het,” het Bianca gesê. “Hy het vier skedelkrake opgedoen en hy het ook baie steekwonde. Ons weet nie waarmee hulle hom gesteek het nie, maar dit is duidelik dat dit ʼn skerp voorwerp was.”

Sy sê dokters wag nou eers dat die swelling sak voordat die skade behoorlik bepaal kan word en daar op verdere behandeling besluit kan word. Hulle verwag wel dat Scheepers ʼn operasie sal moet ondergaan om die wonde aan sy kop te heg.

Volgens Bianca is haar pa iemand wat nie kan stilsit nie en is hy baie betrokke by plaaslike gemeenskapsgroepe in die omgewing. “Mens hoor altyd van die misdaad en hierdie verskriklike aanvalle en dan voel jy so jammer vir die slagoffers, maar hierdie is nou so close to home. Nou het dit met óns pa gebeur. En dit is natuurlik erg as dit met enigiemand gebeur, maar ek kan nie help nie om te vra, hoekom hy? En hulle het niks eens gevat nie – die bakkie is klaar teruggevind. Hoekom hom so aanrand vir niks?”

Sy sê sy, haar broer en suster is almal op die oomblik in Port Elizabeth om by hul pa te wees en hom te ondersteun. “Ons kan nou net bid en glo dat hy sal herstel.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

25 Kommentare

jongste oudste gewildste
Mariette Hammann

Werkers is by meeste van die aanvalle betrokke. Ek neem dit maar met ‘n knippie sout.

ACCA

As dit nie rassisties gemotiveerd is nie dan weet ek ook nie. Die KVC en Spur geval was minder traumaties en was mos natuurlik wit op swart en het wyd media dekking gekry maar die wrede aanval is mos deur beskermde mense gedoen wat nie kan rassisties wees nie en word nog sagkuns deur alle media en politiek hanteer. Hulle is net so slaggat soos die mense wat dit doen

Oplossing?

Kom mense, kom met ‘n oplossing! Eerstens sal daar daadwerklik moet gekyk word of daar ‘n algemene patroon van foute is wat gemaak word asook ‘n algemene metode wat deur die tweepotiges gevolg word. Om vir jou ‘n hond aan te skaf wat jou slaafs volg is seker ook deel van die oplossing. ‘n Aaphok soos vroeër jare gebruik met ‘n wag sal ook help. Daar is natuurlik nog maatreëls maar die oplossing is nie maklik, beide uitvoerbaarheid en kostes sal ‘n enorme invloed hê.

Johaz

As die ondersoek beamptes nie tyd verspeel nie kan daar redelik vinnig bepaal word wat die motief van die aanval was, soos om die werker, wat ‘n hoorgetuie was, te vra of daar enige gesprek gevoer is tussen die aanvallers en die slagoffer. Het hulle hom beskuldig van iets? Wou hulle iets van hom hê? Het hy hulle geken of voorheen gesien? ens. Wat het die slagoffer gesê of geantwoord? So kan daar gou bepaal word of dit moontlik is dat hulle nog in die omgewing is en of hulle vanvêr kom, anders word dit maar net nog ‘n statistiek.

Muffin

Ja elke dag moet ons die teleurstellende berigte kry. Niks word daaromtrent gedoen nie. Daar sal ook niks gedoen word nie. Bianca baie sterkte vir jou en die hele familie. Ek is net baie dankbaar dat Riaan dit oorleef het. Dalk sal hy die rowers erken of kan uitwys of die werker.