Werkers nou vergoed vir newe-effekte van inenting

(Foto: Justin Tallis/AFP)

Diegene wat deur hul werkgewers gedwing word om teen Covid-19 ingeënt te word en newe-effekte as gevolg daarvan ontwikkel, kan nou vergoeding van die Vergoedingskommissaris eis.

Die Vergoedingskommissaris sal die onkoste van enige beserings, siektes of dood wat verband hou met dié inenting dek. Dít is mits dit van die betrokke werknemer deur sy werkgewer, as ʼn vereiste van indiensneming, vereis word om die inenting te ontvang.

Die Vergoedingsfonds se jongste aankondiging is onlangs in die Staatskoerant gepubliseer. Luidens die kennisgewing sal eise slegs verwerk word as dit aan ʼn reeks kriteria voldoen.

Die eerste vereiste is dat die geaffekteerde werknemer met ʼn Sahpra-goedgekeurde Covid-19-entstof ingeënt is. Bewyse moet ook verskaf word dat die betrokke werkgewer se risikobeoordelingstrategie vereis dat sy werknemers teen Covid-19 ingeënt moet word.

Verder moes die werknemer simptome getoon het, wat algemeen as newe-effekte van die entstof erken word en ʼn chronologiese tydlyn van gebeure, wat strek van die eerste inenting tot die ontwikkeling van simptome, verskaf.

“Bykomende toetse kan ook benodig word om die teenwoordigheid van enige abnormaliteite in die aansoeker se liggaam te bepaal.”

Sake-eenheid Suid-Afrika (Busa) het onlangs aangekondig dat hy die hooggeregshof wil nader vir ʼn bevel wat sakeondernemings toelaat om inentings in die werkplek af te dwing. ʼn Aantal ondernemings en universiteite maak egter reeds werk daarvan om dié reël as ʼn vereiste van indiensneming in hul risikobeoordelingstrategie in te skryf.

Die Universiteit van Kaapstad beplan om teen volgende jaar te vereis dat alle personeel, as ʼn voorwaarde vir werk, en studente, as ʼn voorwaarde vir registrasie, ʼn bewys moet lewer dat hulle ten volle teen die virus ingeënt is.

die kommissaris het benadruk dat werknemers se eise individueel geëvalueer sal word waarna die vergoeding daarvoor bepaal sal word.

Kommer heers egter nou of dit moontlik gaan wees vir die Vergoedingskommissaris om eise van dié aard op ʼn tydige wyse uit te betaal.

Talle werknemers wag al vir jare dat hul eise teen die vergoedingskommissaris vir onder meer beroepsbeserings gefinaliseer word en duisende werkers sit steeds met leë hande ná uitbetalings weens die Covid-19-pandemie verlede jaar gesloer het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

35 Kommentare

jongste oudste gewildste
Saartjievandiebosveld

All talk and no do!!!!!

Samuel

Ag tog, alles is ‘n gemors. Die uitbetaling sal miskien in ‘n ander lewe gedoen word. Boonop doen niemand mos newe-effekte op van die inenting nie. Dit is alles net “window dressing.”

Papsak

Ja hou op mense en werkers om koop vir ent oor twee jaar sal ons sien waar is hulle dan lag julle breed

Tipper

So ja julle wou mos die mense dreig,nou sal julle betaal! saffaaa.

JoHines

Afrika o Afrika