Werkers sterf toe polisie hul vir rowers aansien

Argieffoto

Robbie Raburabu, waarnemende nasionale woordvoerder van Opod, het aan Maroela Media gesê die polisiebeamptes is Maandag in die vroeë oggendure na ʼn toneel by ʼn vulstasie ontbied waar ʼn rooftog aan die gang was.

“Met die polisiebeamptes se aankoms op die toneel het die vermeende rowers in ʼn Quantum-bussie gespring en op die polisie losgebrand,” het Raburabu gesê. “Die polisie het teruggeskiet en ʼn tweede Quantum-bussie het tussen die vermeende rowers en die polisie ingery en so in die spervuur beland. Vermoedelik het die polisiebeamptes gedink die insittendes in die tweede bussie was ook verdagtes wat deel was van die rooftog.”

Die tweede bussie se insittendes was egter nie rowers nie, maar werknemers van die nabygeleë McDonalds wat op pad was werk toe. Volgens Raburabu het die polisiebeamptes ophou skiet toe hulle hul fout agterkom en probeer om die insittendes van die tweede bussie te help.

Twee van die McDonalds-werknemers is doodgeskiet en drie is beseer. Twee van die vermeende rowers in die eerste Quantum bussie is ook doodgeskiet.

“Opod ondersoek in dié stadium ʼn saak van moord en poging tot moord,” het Raburabu gesê. Dit is nie duidelik wat die rowers tydens die rooftog gesteel het nie.